کراچی میں آج سے بارش کا نیاسلسلہ شروع، سردی مزید بڑھنے کا امکان

کراچی: محکمہ موسمیات کہا ہے کہ کراچی کے کئی علاقوں میں آج سے چار روز تک موسم سرما کی بارش کا دوسرا سلسلہ شروع ہونے کی توقع ہے جبکہ بارش کے بعد شہر میں سردی مزید بڑھنے کا امکان ہے۔

محکمہ موسمیات کے مطابق تیز ہواؤں کا مغربی موسمی نظام شمالی بلوچستان میں داخل ہوگیا ہے جس سے گوادر، پسنی اور جیوانی سمیت صوبے کے مختلف علاقوں میں موسلادھار بارش ہوئی۔

گوادر اور اس کے ملحقہ علاقوں میں سات گھنٹے تک مسلسل بارش ہوئی۔ ساحلی شہر میں بارش کا پانی گھروں میں داخل ہونے سے شہریوں کو مشکلات کا سامنا کرنا پڑا۔بارش شروع ہونے کے بعد گوادر میں بجلی کی فراہمی بھی معطل ہے۔

محکمہ موسمیات نے موسم کی نئی صورتحال کو گندم کے کاشتکاروں کے لیے فائدہ مند قرار دیا ہے۔تاہم متعلقہ حکام کو موسلا دھار بارش کی وجہ سے الرٹ رہنے کا مشورہ دیا ہے جس سے سبی، بولان، قلات، خضدار، نصیر آباد، کوہلو اور کوہ سلیمان کے خطرناک علاقوں میں 05 جنوری تک سیلابی صورتحال پیدا ہوسکتی ہے۔

مزید پڑھیں:اومی کرون کا خطرہ: کیا پاکستان ایک اور لاک ڈاؤن کی جانب بڑھ رہا ہے؟

4 سے 6 جنوری تککوئٹہ، پشین، زیارت، قلعہ عبداللہ، ہرنائی، چمن، مری، گلیات، نتھیاگلی، کاغان، ناران، دیر، سوات، چترال، استور، اسکردو، ہنزہ، گلگت، وادی نیلم، باغ اور حویلیاں میں شدید برفباری کے باعث سڑکیں بند ہوسکتی ہیں۔

ترجمان پی ایم ڈی ڈاکٹر ظہیر احمد بابر کاکہنا ہے کہ مغربی موسم کا مضبوط نظام بلوچستان میں داخل ہو گیا ہے اور آئندہ تین سے چار روز میں ملک کے بالائی علاقوں تک پہنچ جائے گا۔

یہ پنجاب، خیبرپختونخوا، سندھ اور بلوچستان سمیت ملک بھر میں بارش کا پہلا بڑا اسپیل ہے جس کے دوران درجہ حرارت گر سکتا ہے۔

انہوں نے کہا کہ یہ نظام ملک بھر میں بڑے پیمانے پر وقفے وقفے سے بارشیں پیدا کرے گا جبکہ بارش کی شدت بعض اوقات درمیانے درجے سے بھاری بارشوں تک مختلف ہو گی۔