ہالی ووڈ اداکارہ انجلینا جولی جلد سیلاب متاثرہ علاقوں کا جائزہ لینے کیلئے پاکستان آئیں گی

ہالی ووڈ اداکارہ اور اقوام متحدہ کی خصوصی سفیر انجلینا جولی جلد سیلاب متاثرہ علاقوں کا جائزہ لینے کے لیے پاکستان آئیں گی۔

انجلینا جولی تباہ کن سیلاب سے متاثرہ افراد کی مدد کے لیے پاکستان کا دورہ کریں گی، تاہم ان کے پاکستان آنے کی تاریخ کا اعلان نہیں کیا گیا۔

انٹرنیشنل ریسکیو کمیٹی (آئی آر سی) کی جانب سے جاری کیے گئے بیان میں بتایا گیا ہے کہ انجلینا جولی سیلاب سے متاثرہ علاقوں کے دورے کے دوران متاثرہ افراد سے ملاقات کریں گی اور مستقبل میں ایسے مسائل کو روکنے کے حوالے سے اقدامات پر گفتگو کریں گی۔

آئی آر سی کے بیان کے مطابق انجلینا جولی اپنے دورے کے دوران اس بات کا مشاہدہ کریں گی کہ پاکستان جیسے ممالک موسمیاتی تبدیلیوں کے اس بحران کی سب سے بڑی قیمت کس طرح ادا کر رہے ہیں، جس کے وہ ذمہ دار بھی نہیں ہیں۔

یہ بھی پڑھیں:

معروف بھارتی اداکارہ نے محبت میں ناکامی پر زندگی کا خاتمہ کرلیا

انجلینا جولی اس سے قبل 2010 کے سیلاب اور 2005 کے زلزلے کے متاثرین سے ملاقات کے لیے بھی پاکستان آچکی ہیں۔

واضح رہے کہ حالیہ مون سون بارشوں اور سیلاب کی تباہ کاریوں کی وجہ سے پاکستان مین 30 ملین لوگ بے گھر ہوگئے ہیں اورتقریباََ 40 بلین ڈالر تک کا مالی نقصان ہوا ہے۔