دہلی میں شدید بارشیں، 46سال کا ریکارڈ ٹوٹ گیا، پروازیں معطل

ممبئی:بھارتی دارالحکومت دہلی میں شدید بارشوں کے باعث نظام زندگی درہم برہم ہوگیا، مون سون سیزن میں کل 1100 ملی میٹر بارش ریکارڈ ہوئی جو 1975 کے بعد سب سے زیادہ بارش کا ایک ریکارڈ ہے۔

بھارتی میڈیا کا کہناہے کہ دہلی میں ہونے والی شدید بارشوں کے باعث سڑکیں تالاب کا منظر پیش کر رہی ہیں جب کہ اندرا گاندھی ایئرپورٹ کا رن وے بھی پانی میں ڈوب گیا اور پروازیں معطل کردی گئی ہیں۔ محکمہ موسمیات کے مطابق شدید بارشوں کا سلسلہ کل بھی جاری رہے گا۔

بارشوں کے سبب شہر کا ایک بڑا حصہ تاریکی میں ڈوب گیا جب کہ ذرائع آمد و رفت معطل ہوگیا، مواصلاتی نظام بھی متاثر ہے، میونسپل اداروں اور اسپتالوں میں عملے کی چھٹیاں منسوخ کرکے ایمرجنسی نافذ کردی گئی ہے۔

#WATCH | Parts of Delhi Airport waterlogged following heavy rainfall in the national capital; visuals from Indira Gandhi International Airport (Terminal 3) pic.twitter.com/DIfUn8tMei

— ANI (@ANI) September 11, 2021

شدید بارشوں کے باعث مرکزی شاہراؤں اور انڈر پاسز میں پانی جمع ہونے کے باعث گاڑیوں کی قطاریں لگ گئیں اور لوگ پیدل اپنے گھروں کو جانے پر مجبور ہوگئے۔ ہورڈنگز گرگئے جس کے باعث 10 سے زائد افراد کے زخمی ہونے کی اطلاع ہے۔

نئی دہلی کا اس حوالے سے اپنے بیان میں کہنا ہے کہ ریکارڈ توڑ بارش ہونے کے باوجود ہلاکتیں نہیں ہوئیں۔ درجن بھر شہری مختلف واقعات میں معمولی زخمی ہوئے ہیں۔ حالات مکمل طور پر کنٹرول میں ہیں۔جبکہ سوشل میڈیا کے مطابق حالات بہت زیادہ خراب ہیں۔