گوگل نیوز پر ہمیں فالو کریںاسلام آباد: وزیر خارجہ مخدوم شاہ محمود قریشی نے روس ہم منصب سرگئی لاروف کے ساتھ ٹیلیفونک رابطہ کیا ہے۔ دونوں رہنماؤں کے درمیان دو طرفہ تعلقات، مختلف شعبہ جات میں تعاون کے فروغ سمیت باہمی دلچسپی کے امور پر تبادلہ خیال کیا گیا۔
وزارت خارجہ کی جانب سےجاری ہونے والے اعلامیے کے مطابق وزیر خارجہ شاہ محمود قریشی کا اس موقع پر بات چیت کرتے ہوئے کہنا تھا کہ پاکستان، روس کے ساتھ اپنے دو طرفہ تعلقات کو مزید فروغ دینے کا خواہشمند ہے۔ اور وقت کے ساتھ ساتھ ان دو طرفہ تعلقات میں وسعت انتہائی خوش آئند ہے۔ ہم روس کے ساتھ کثیر الجہتی شعبہ جات میں دو طرفہ تعاون کے فروغ کیلئے پرعزم ہے۔
شاہ محمود قریشی نے کہا کہ آپ کے دورہ پاکستان سے دونوں ممالک کے تعلقات مزید مستحکم ہوئے ہیں۔ ہمیں اس دوران اہم علاقائی اور عالمی امور پر تفصیلی تبادلہ خیال کا موقع ملا۔ پاکستان سٹریم گیس پائپ لائن منصوبے پر دونوں ممالک کے مابین ضمنی معاہدے پر دستخط انتہائی مثبت پیشرفت ہے۔
مخدوم شاہ محمود قریشی نے کورونا وبا کے پھیلاؤ کو روکنے کیلئے پاکستان کی معاونت پر روسی وزیر خارجہ کا شکریہ ادا کیا۔ دونوں وزرائے خارجہ نے باہمی دلچسپی کے علاقائی اور عالمی امور پر مشاورت جاری رکھنے پر اتفاق کیا۔
وزیر خارجہ نے کہا کہ ہم توانائی کے شعبے میں تعاون کے فروغ کیلئے اس منصوبے کے جلد آغاز کے متمنی ہیں۔ ہم روس کی طرف سے پاکستان سے چاول کی امپورٹ پر عائد پابندی کے خاتمے کا خیر مقدم کرتے ہیں۔
دونوں وزرائے خارجہ نے پاکستان اور روس کے مابین دو طرفہ تجارت کے حجم میں اضافے کیلئے مشترکہ کاوشیں بروئے کار لانے پر اتفاق کیا ہے۔
یہ بھی پڑھیں : کوئٹہ میں بارودی سرنگ کا دھماکہ، فرنٹیئر کور کے 4 جوان شہید
