دہشتگردی سے نمٹنے کے لئے مربوط ردعمل کی ضرورت ہے، آرمی چیف

راولپنڈی:پاک فوج کے سربراہ سپہ سالار جنرل قمر جاوید باجوہ کا کہنا ہے کہ دہشت گردی عالمی خطرہ ہے، یہ خطرہ علاقائی عدم استحکام کی صلاحیت رکھتا ہے، اس سے نمٹنے کے لئے مربوط ردعمل کی ضرورت ہے۔

آئی ایس پی آر کے مطابق سپہ سالار سے عراقی نیوی کے کمانڈر لیفٹیننٹ جنرل احمد جاسم معارج عبداللہ نے ملاقات کی، ملاقات میں باہمی دلچسپی اور علاقائی سلامتی کے امور پر تبادلہ خیال کیا گیا۔

آئی ایس پی آر کے جاری کردہ بیان کے مطابق عراقی بحریہ کے سربراہ نے پاکستان کی مسلح افواج کی پیشہ وارانہ مہارت کا اعتراف کیا اور بلوچستان میں ہیلی کاپٹر حادثے میں قیمتی جانوں کے ضیاع پراظہار تعزیت کیا۔

آئی ایس پی آر کے مطابق کمانڈر لیفٹیننٹ جنرل احمد جاسم معارج عبداللہ نے علاقائی استحکام میں پاکستان کے کردار کو سراہا۔

آرمی چیف نے کہا کہ دہشتگردی کا خطرہ علاقائی عدم استحکام کی صلاحیت رکھتا ہے، دہشتگردی سے نمٹنے کے لئے بہترین اور مربوط ردعمل کی ضرورت ہے۔

مزید پڑھیں:عراقی بحریہ کے سربراہ کا نیول ہیڈکوارٹرز کا دورہ

سپہ سالار نے مزید کہا کہ پاکستان عراق کے ساتھ اپنے برادرانہ تعلقات کو قدر کی نگاہ سے دیکھتا ہے، انسداد دہشتگردی کی جنگ میں عراقی قوم کی قربانیوں کا ادراک ہے، دہشت گردی عالمی خطرہ ہے۔