شہباز گل نے کچھ جملے ایسے کہے جو نہیں کہنے چاہیے تھے، شاہ محمود قریشی

پاکستان تحریک انصاف کے وائس چیئرمین شاہ محمود قریشی کا کہنا ہے کہ شہباز گل نے کچھ جملے ایسے کہے جو انہیں نہیں کہنے چاہیے تھے، انہیں خیال کرنا چاہیے تھا۔

ایک بیان میں شاہ محمود قریشی نے کہا کہ جس انداز میں شہباز گل کو گرفتار کیا گیا وہ مناسب نہیں تھا، ہم قانونی اور سیاسی طریقے سے اپنا دفاع کریں گے۔

دوسری جانب فواد چوہدری نے شہباز گل کے بیان سے لاتعلقی کا اظہارکرتے ہوئے کہا ہے کہ شہباز گل نے جو کہا وہ ان کی ذاتی رائے تھی، پارٹی کا بیانیہ نہیں تھا، جس طرح باقی رہنماؤں کو معاف کیا گیا، شہباز گل کو بھی معاف کر دینا چاہیے۔

واضح رہے کہ پی ٹی آئی رہنما شہباز گل کو اسلام آباد سے گرفتار کیا گیا ان پر تھانہ کوہسار میں اداروں کے خلاف مبینہ غداری سمیت سنگین نوعیت کے 10 مقدمات درج ہیں۔

گزشتہ روز اسلام آباد کی مقامی عدالت نے شہباز گل کو دو روز کے جسمانی ریمانڈ پر پولیس کے حوالے کیا ہے۔