ترکی میں قیامت خیز حادثہ! سیاحوں کی بس کو ٹرک نے روند ڈالا، 11 جاں بحق، 27 زخمی

ترکی کے مغربی صوبے مانیسا میں سیاحتی بس اور لکڑی کے بھاری تختوں سے لدے ٹرک کے درمیان خوفناک تصادم کے نتیجے میں کم از کم 11 افراد ہلاک اور 27 زخمی ہوگئے۔ حادثے کے بعد دونوں گاڑیاں الٹ گئیں جبکہ حکام نے تحقیقات کے سلسلے میں دونوں ڈرائیوروں کو حراست میں لے لیا ہے۔

ترک اور بین الاقوامی میڈیا کے مطابق حادثہ اتوار، 11 اکتوبر کو مقامی وقت کے مطابق صبح 11 بجے کے بعد گبزے، اورہان غازی اور ازمیر شاہراہ پر پیش آیا۔ تصادم کے نتیجے میں بس کے پچھلے حصے کو شدید نقصان پہنچا۔ اطلاع ملتے ہی پولیس، فائر بریگیڈ اور طبی امدادی ٹیمیں جائے حادثہ پر پہنچ گئیں اور زخمیوں کو قریبی اسپتالوں میں منتقل کردیا گیا۔

مانیسا کے گورنر وہدتین اوزکان کے مطابق بس میں 34 مسافر اور عملے کے تین ارکان سوار تھے جبکہ ٹرک پر ایک ڈرائیور موجود تھا۔ زخمیوں میں سے 16 افراد کو یلو کوڈ، 9 کو گرین کوڈ اور ایک کو ریڈ کوڈ کے تحت طبی درجہ بندی دی گئی۔

دونوں ڈرائیور زیرِ حراست، تحقیقات جاری

حادثے کی وجوہات جاننے کے لیے بس اور ٹرک کے ڈرائیوروں کو حراست میں لے لیا گیا ہے۔ اطلاعات کے مطابق بس ڈرائیور کو اسپتال سے فارغ ہونے کے بعد پولیس نے تحویل میں لیا جبکہ ٹرک ڈرائیور سے بھی تفتیش کی جارہی ہے۔

مقامی اخبار حریت کی رپورٹ کے مطابق ابتدائی اطلاعات میں دعویٰ کیا گیا ہے کہ ٹرک سڑک کی غلط سمت میں سفر کر رہا تھا تاہم حکام نے ابھی تک حادثے کی حتمی وجہ کی تصدیق نہیں کی۔

ترکی کے وزیر داخلہ مصطفیٰ چفتچی نے سوشل میڈیا پلیٹ فارم ایکس پر اپنے بیان میں کہا کہ ڈیزاسٹر اینڈ ایمرجنسی مینجمنٹ اتھارٹی، پولیس، سکیورٹی اہلکاروں، فائر بریگیڈ اور طبی ٹیموں نے فوری طور پر امدادی کارروائیاں شروع کردیں۔

حکام کے مطابق حادثے میں ہلاک ہونے والے افراد ترک شہری تھے تاہم غیر ملکی شہریوں کی ممکنہ موجودگی کے بارے میں مزید تفصیلات سامنے نہیں آئیں۔

گورنر وہدتین اوزکان نے جائے حادثہ کا دورہ کرنے کے بعد بتایا کہ واقعے کی تحقیقات مقامی پراسیکیوٹر کے دفتر کی نگرانی میں جاری ہیں۔ انہوں نے ٹریفک قوانین پر سختی سے عمل کرنے کی ضرورت پر زور دیتے ہوئے کہا کہ سڑکوں پر احتیاط اور قوانین کی پابندی انسانی جانوں کے تحفظ کے لیے انتہائی اہم ہے۔

ترکی میں بس حادثات کا سلسلہ

ترکی میں یہ رواں سال پیش آنے والا ایک اور مہلک ٹریفک حادثہ ہے۔ اس سے قبل 15 اگست کو صوبہ دیاربکر کے ضلع لیجے میں منگنی کی تقریب میں شرکت کے لیے جانے والی ایک منی بس الٹ گئی تھی جس کے نتیجے میں سات افراد ہلاک اور نو زخمی ہوگئے تھے۔

ترک میڈیا کے مطابق حادثے کے وقت منی بس میں 18 افراد سوار تھے۔ دیاربکر کے گورنر مراد زورلو اوغلو نے بتایا تھا کہ گاڑی کا ٹائر پھٹنے کے باعث ڈرائیور اس پر قابو نہ رکھ سکا جس کے نتیجے میں منی بس سڑک سے نیچے جاگری۔

مانیسا میں تازہ حادثے کے بعد ایک بار پھر ٹریفک قوانین کی پابندی اور شاہراہوں پر مسافروں کی حفاظت سے متعلق اقدامات کی اہمیت اجاگر ہوئی ہے۔ حکام کے مطابق موجودہ حادثے کی حتمی وجوہات کا تعین تحقیقات مکمل ہونے کے بعد کیا جائے گا۔