گوگل نیوز پر ہمیں فالو کریںبالی ووڈ اداکارہ کرینہ کپور کا دیوالی کے موقع پر پہنا گیا شاہانہ لباس اور تاریخی زیور سوشل میڈیا پر توجہ کا مرکز بن گیا تاہم ان کے گلے میں موجود آیت الکرسی سے مزین تقریباً 200 سال پرانے شاہی پینڈنٹ نے ایک نیا تنازع کھڑا کر دیا ہے۔
بھارتی میڈیا رپورٹس کے مطابق کانگریس رہنما اور نیشنل میڈیا کوآرڈینیٹر عباس حفیظ نے کرینہ کپور اور معروف اسٹائلسٹ ریا کپور کو قانونی نوٹس بھجوا دیا ہے۔ نوٹس میں اعتراض اٹھایا گیا ہے کہ قرآن پاک کی آیت پر مشتمل مقدس زیور کو جس لباس اور انداز میں سوشل میڈیا پر پیش کیا گیا وہ اس کی مذہبی حرمت کے تقاضوں کے مطابق نہیں تھا۔
View this post on Instagram
اطلاعات کے مطابق 11 نومبر کو جاری کیے گئے قانونی نوٹس میں مطالبہ کیا گیا ہے کہ متعلقہ سوشل میڈیا اکاؤنٹس سے تصاویر، ویڈیوز اور پوسٹس ہٹائی جائیں، عوامی سطح پر معذرت کی جائے اور آئندہ اس مقدس عبارت کو ایسے انداز میں پیش نہ کرنے کی یقین دہانی کروائی جائے جس سے اس کی مذہبی حرمت متاثر ہونے کا خدشہ ہو۔
ریا کپور نے کرینہ کپور کے دیوالی لُک کو اسٹائل کیا تھا اور اپنے انسٹاگرام پیغام میں ان کے لباس اور زیورات کی تفصیلات بھی شیئر کی تھیں۔
انہوں نے بتایا تھا کہ اداکارہ نے خالص چاندی کا کفتان اور پگڑی پہن رکھی تھی جبکہ ان کے زیورات میں بھوپال کے نواب اور بیگم سے منسوب تقریباً 200 سال پرانی کلغی اور 30 قیراط کا زمرد بھی شامل تھا جس پر آیت الکرسی کندہ ہے۔
قانونی نوٹس میں کرینہ کپور کے لباس پر کیا اعتراض اٹھایا گیا؟
قانونی نوٹس میں واضح کیا گیا ہے کہ درخواست گزار کو کرینہ کپور یا ریا کپور کے عمومی لباس، ذاتی پسند اور زیورات پہننے کے حق پر کوئی اعتراض نہیں تاہم ان کا مؤقف ہے کہ قرآن پاک کی مقدس آیت سے مزین زیور کو عوامی سطح پر پیش کرتے وقت لباس، انداز اور سوشل میڈیا پر اس کی تشہیر میں مذہبی احترام کو ملحوظ خاطر رکھنا چاہیے۔
نوٹس کے مطابق متعلقہ تصاویر اور پوسٹس میں زیور کی پیشکش کا انداز اس مذہبی احترام کا عکاس نہیں تھا جس کا تقاضا آیت الکرسی جیسی مقدس عبارت کرتی ہے۔
اس میں مزید کہا گیا ہے کہ بعض اسلامی علماء قرآن پاک کی آیات کو زیورات کی شکل میں استعمال کرنے کے حوالے سے تحفظات رکھتے ہیں۔ ان کی رائے میں ایسی مقدس عبارتوں کی حرمت برقرار رکھنا ضروری ہے اور ایسے حالات سے گریز کیا جانا چاہیے جہاں ان کی بے ادبی کا خدشہ ہو تاہم نوٹس میں یہ بھی تسلیم کیا گیا ہے کہ اس معاملے پر علماء کی آراء مختلف ہو سکتی ہیں۔
کرینہ کپور کو بھوپال کے شاہی خاندان کا تاریخی زیور کیسے ملا؟
کرینہ کپور کے زیر استعمال اس تاریخی زیور کا تعلق ان کے شوہر اور بالی ووڈ اداکار سیف علی خان کے خاندانی پس منظر سے جوڑا جا رہا ہے۔
تاریخی طور پر بھوپال کے آخری حکمران نواب حامد اللہ خان کی صاحبزادی اور ساجدہ سلطان، سیف علی خان کی دادی تھیں۔ ان کی شادی پٹودی خاندان کے افتخار علی خان سے ہوئی تھی جن کے صاحبزادے منصور علی خان پٹودی، سیف علی خان کے والد تھے۔
رپورٹس کے مطابق بھوپال کے شاہی خاندان سے منسوب یہ قیمتی زیور نسل در نسل منتقل ہوتا رہا اور بالآخر سیف علی خان کے خاندان کے ذریعے کرینہ کپور تک پہنچا۔
اس طرح دیوالی کے موقع پر پہنا گیا یہ تاریخی پینڈنٹ نہ صرف اپنی قیمتی ساخت بلکہ مذہبی عبارت اور شاہی خاندانی پس منظر کے باعث بھی خبروں میں آگیا ہے۔
