پی ایس ایل کی لائیو اسٹریمنگ کے حقوق کی بولی میں 175 فیصد اضافہ

دراز نے ایچ بی ایل پاکستان سپر لیگ کے سیزن 2022 اور 2023 کی لائیو اسٹریمنگ کے حقوق کے لیے سب سے زیادہ بولی لگا دی۔لائیو اسٹریمنگ کے حقوق کی خریداری کے لئے ماضی کے مقابلے میں 175 فیصد زائد قیمت کی بولی لگائی گئی۔

تفصیلات کے مطابق دراز نے سب سے زیادہ بولی کا نیا ریکارڈ قائم کیا۔ قبل ازیں اے آر وائی اور پی ٹی وی کی کنسورشیم بھی ایچ بی ایل پاکستان سپر لیگ کے سیزن 2022 اور 2023 کے نشریاتی حقوق کے لیے گزشتہ سائیکل کے مقابلے میں 50 فیصد زائد قیمت کی بولی لگا چکی ہیں۔

یہ بھی پڑھیں:

قائداعظم ٹرافی کا ڈے اینڈ نائٹ فائنل 25 دسمبر سے شروع ہوگا

شاہین کاکپتانی سے متعلق شاہد آفریدی کا مشورہ ماننےسےانکار

قائمقام چیف ایگزیکٹو آفیسر پاکستان کرکٹ بورڈ سلمان نصیر کا کہنا ہے کہ ایچ بی ایل پی ایس ایل کی لائیو اسٹریمنگ کے حقوق کی بڈ میں اضافے سے لیگ کی مقبولیت کا اندازہ لگایا جاسکتا ہے۔ڈیجیٹل دور میں کھیلوں کی تعمیر و ترقی کو فروغ حاصل ہوا۔ 

سلمان نصیر نے کہا کہ آج کے ڈیجیٹل دور میں لائیو سٹریمنگ کھیلوں کی ترقی اور فروغ میں ایک اہم کردار ادا کررہا ہے اور انہیں یقین ہے کہ لیگ کے آئندہ دو ایڈیشنز ایکشن سے بھرپور ہوں گے جس سے شائقینِ کرکٹ کی ایک بڑی تعداد محظوظ ہوگی اور وہ اس اعتماد پر دراز کے مشکور ہیں۔

چیف ایگزیکٹو آفیسر دراز عمار حسن کا کہنا ہے کہ انہیں ایچ بی ایل پاکستان سپر لیگ کے لیے لائیو اسٹریمنگ کے حقوق کے حصول کے لیے سب سے بڑی پیشکش کرنے پر فخر ہے۔ دراز پاکستان کا نمبر ایک ڈیجیٹل پلیٹ فارم بننا چاہتا ہے۔

عمار حسن نے کہا کہ یہ حقوق مل گئے تو پورا پاکستان دراز ایپ پر ان میچز کو مفت اسٹریم کر سکے گا اور 20 ملین سے زیادہ پروڈکٹس پر شاندار قیمتوں سے لطف اندوز بھی ہوسکے گا۔ ایچ بی ایل پاکستان سپر لیگ پاکستان کرکٹ کا فلیگ شپ برانڈ ہے۔

انہوں نے کہا کہ ہم ایچ بی ایل پی ایس ایل 7کے فروغ کے لئے ہر ممکن تعاون کرنے کو تیار ہیں۔واضح رہے کہ ایچ بی ایل پاکستان سپر لیگ کے ساتویں ایڈیشن کا آغاز 27 جنوری کو کراچی کے نیشنل اسٹیڈیم سے ہوگا۔لیگ کے تمام میچز پاکستان میں ہوں گے۔