ایمپلائرز فیڈریشن نے لیتھیم کو پاکستان کا پوشیدہ سونا قرار دے دیا

کراچی:ایمپلائرز فیڈریشن آف پاکستان کے صدر اسماعیل ستار نے لیتھیم دھات کو پاکستان کا پوشیدہ سونا قرار دیتے ہوئے پختہ یقین کا اظہار کیا ہے کہ پاکستان میں لیتھیم کے وسیع ذخائر کے غیر معمولی امکانات موجود ہیں۔

ان کا کہنا ہے کہ پاکستان کو قدرت نے 92 معدنیات کی حیرت انگیز تعداد سے نوازا ہے اور ہر ایک معدنیات اپنی پوشیدہ صلاحیت رکھتا ہے تاہم ہائیڈرو کاربن فیول کے ماحول دوست متبادل کے طور پر لیتھیم دھات بتدریج دنیا کے سامنا آرہی ہے۔

ای ایف پی کے صدر اسماعیل ستار نے میڈیا کو جاری بیان میں کہاکہ درحقیقت دنیا کی 75 فیصد لیتھیم کی سپلائی چلی، ارجنٹائن اور بولیویا سے حاصل ہوتی ہے جسے لیتھیم ٹرائنگل بھی کہا جاتا ہے۔

یہ اعلان انتہائی اعزاز کی بات ہے کہ پاکستان میں نمک کی جھیلوں میں نئے دریافت ہونے والے لیتھیم کے ذخائر اس ملک کی معدنی برآمدات کے حوالے سے صلاحیتوں میں انقلاب برپا کریں گے۔

مزید پڑھیں:
ورلڈ انویسٹر ویک منانے کیلئے اسٹاک ایکس چینج میں گونگ تقریب

سندھ حکومت ذخیرہ اندوزوں کو فائدہ دینے کے لیے گندم تاخیر سے ریلیز کرتی ہے، محمود مولوی

انہوں نے اس خصوصی لیتھیم سرکل میں شامل ہونے مسرت کا اظہار کیا جو اس وقت بجلی کی پیداوار کا سب سے قیمتی متبادل ہے ایسے وقت میں جب پوری دنیا کاربن کی کمی پر نظریں جمائے ہوئے ہے۔

اسماعیل ستار نے مزید کہا کہ پاکستان میں سالانہ 10 لاکھ سے 30 لاکھ ٹن لیتھیم پیدا کرنے کی گنجائش موجود ہے جس کی فی الوقت قیمت 10 ہزار ڈالر سے 12 ہزار ڈالر فی ٹن ہے۔

ای ایف پی سالٹ مینوفیکچررز ایسوسی ایشن آف پاکستان کے ساتھ ایک افہام و تفہیم سے لیک برائن سے لیتھیم پر ابتدائی پائلٹ اسٹڈی میں اپنا اہم کردار ادا کررہا ہے جو اس وقت مختلف سائٹس پر جاری ہے۔

انہوں نے سرمایہ کاروں کی دلچسپی اور ان کی حوصلہ افزائی کے لیے اس طرح کے توانائی کے وسیع عمل کو آسان بنانے کے لیے کاروباری لاگت کم کرنے کے سلسلے میں حکومت کے تعاون کے ساتھ پختہ یقین ظاہر کیا کہ پاکستان دنیا کو لیتھیم مصنوعات کی فراہمی میں اہم کردار ادا کرے گا۔