گوگل نیوز پر ہمیں فالو کریںلاہور: قومی کرکٹ ٹیم اور پشاور زلمی کے کپتان بابراعظم نے اپنے اوپر کی جانے والی تنقید پر کہا ہے کہ سابق کرکٹرز کی اپنی رائے ہوتی ہے، تنقید کا سلسلہ چلتا رہتا ہے اور یہ نہیں ہوسکتا کہ ہر کوئی بس آپ کے حق میں بولے۔
نجی ٹی وی چینل سے گفتگو کرتے ہوئے بابراعظم نے کہا کہ میں چیزوں کو پازیٹو لینے کی کوشش کرتا ہوں، جتنا میں انھیں پازیٹو لیتا ہوں اتنا میرے اعتماد میں اضافہ ہوتا ہے، میں نہ تنقید پر تبصرہ کرتا ہوں، نہ بحث کرتا ہوں اور یہ میرا بنتا بھی نہیں۔
انہوں نے کہا کہ جو کھلاڑی تنقید کرتے ہیں اُن کی اپنی رائے ہوتی ہے، ہرکسی کا ایک اپنا مائنڈ سیٹ ہوتا ہے، میرا اپنا مائنڈ سیٹ ہے، میں بھی وقت کے ساتھ سیکھنے کی کوشش کرتا ہوں، چیزیں تبدیل اور تیز ہوگئی ہیں، اسی کے مطابق چلتا ہوں، آپ ہر روز سو فیصد پرفارم نہیں کرسکتے، بس یہ ہے کہ آپ سیکھتے کیسے ہیں۔
پشاور زلمی نے کراچی کو 24 رنز سے شکست دے دی
پی ایس ایل کے حوالے سے کپتان نے کہا کہ رواں سیزن میں پشاور زلمی کے ساتھ سفر جاری ہے جو اچھا جا رہا ہے، کچھ غلطیوں کی وجہ سے ہمارے کچھ میچز اچھے نہیں گئے، ہم نے غلطیوں پر قابو پانے کی کوشش کی ہے۔
نئی ٹیم کے حوالے سے انہوں نے کہا کہ ہم پروفیشنل کرکٹر ہیں، جتنا جلد دوسری ٹیم میں گھل مل جائیں اتنا اچھا ہوتا ہے، پشاور زلمی فیملی میں انضمام الحق اور محمد اکرم سے میرا کافی تعلق رہا ہے، اس لیے کوئی مشکل نہیں جب کہ ڈیرن سیمی تجربہ کار کرکٹر ہیں، کپتانی کرچکے ہیں، ان سے بہت کچھ سیکھنے کو مل رہا ہے۔
علاوہ ازیں پی ایس ایل میں آنے والے نئے بولرز کے حوالے سے بابراعظم کا کہنا تھا کہ احسان اللہ سمیت جو ینگ بولرز آ رہے ہیں وہ پاکستان کے لیے اچھا ہے لیکن یہ نوجوان کھلاڑی جتنا کھیلیں گے اتنا اچھا ہے، ابھی ہم انہیں بہترین قرار نہیں دے سکتے کیونکہ بہترین بننے کے لیے زیادہ سے زیادہ تسلسل کے ساتھ کھیلنا ہوگا، ہر ٹیم میں بڑے اچھے ایمرجنگ کھلاڑی ہیں، انہیں پریشر میں کھیلنا سیکھنا ہوگا۔
