پاکستان کی سیاسی قیادت کشمیریوں پر مظالم کیخلاف یوم استحصال منانے پر متفق

اسلام آباد :کشمیریوں سے اظہار یکجہتی کیلئے یوم استحصال کی تیاری تیز، وزیر خارجہ شاہ محمود قریشی نے آل پارٹیز کانفرنس کی زیر صدارت کی اور تمام سیاسی جماعتوں کے رہنماؤں کو یوم استحصال کے حوالے سے آگاہ کیا۔

حکومت کے زیر اہتمام آل پارٹیز کانفرنس کا انعقاد کیا گیا جس میں ملک کی تمام بڑی سیاسی جماعتوں کی قیادت نے شرکت کی، وزیر خارجہ نے اس موقع پر خطاب کرتے ہوئے کہا کہ تمام کشمیریوں نے ہندوستان کی خود مختاری کو کالعدم قرار دینے کے غیر آئینی اور یکطرفہ اقدام کو مسترد کردیا ہے۔

انہوں نے کہا کہ ہندوستان کا ہندوتوا نظریہ نہ صرف کشمیریوں کے لئے بلکہ پورے خطے کے امن کیلئے خطرہ ہے۔ بھارت نسلی تعصب کی بنیاد پر مقبوضہ کشمیر کی آبادی کے تناسب کو تبدیل کرنا چاہتا ہے۔ پاکستان کی تمام سیاسی جماعتیں مسئلہ کشمیر کے حوالے سے ایک ہی صفحے پر ہیں۔

وزیر اعظم کے معاون خصوصی برائے قومی سلامتی ڈاکٹر معید یوسف ، خارجہ اور انفارمیشن سیکریٹریوں کے ساتھ اعلی فوجی عہدیداروں نے بھی اے پی سی میں شرکت کی،شاہ محمود قریشی نے لائن آف کنٹرول کے اپنے دورہ کے بارے میں بھی شرکاء کو آگاہ کیا۔

مزید پڑھیں:کشمیر کی خصوصی حیثیت کا خاتمہ بھی عالمی ضمیر کونہیں جگا سکا

شاہ محمود قریشی نے آزاد جموں و کشمیر کے صدر اور وزیر اعظم کے ساتھ اپنی ملاقاتوں کے حوالے سے بھی آگاہ کیا اور اس بات کی تصدیق کی کہ پوری قوم ہندوستان کے مقبوضہ کشمیر کے عوام کے ساتھ یکجہتی کے لئے یوم استحصال منائے گی۔