مہنگائی کا سونامی معیشت کھاگیا، غریب کے خواب دفن ہوگئے،شہبازشریف

لاہور : پاکستان مسلم لیگ (ن) کے صدر شہباز شریف نے مہنگائی میں مزید اضافے کی شدید مذمت کرتے ہوئے کہا ہے کہ ملک میں مزید مہنگائی بڑھنے کا مطلب معاشی پالیسیوں کی ناکامی کی دلیل ہے۔

مہنگائی کا سونامی پاکستان کی معیشت کھاگیا، غریب اور ان کے خواب دفن ہوکر رہ گئے ہیں ۔شہروں سے بھی زیادہ دیہی علاقوں کے عوام مہنگائی سے پس کر رہ گئے ہیں۔

ایک زرعی ملک کو تباہ کرنے کی پالیسی پر عمل ہورہا ہے ،مزید 18 فیصد پاکستانیوں کاغربت کی لکیر سے نیچے جانا معاشی تباہی وبربادی کے اثرات ہیں۔

مزید پڑھیں:ملک لوٹنے والے لندن میں عیاشیوں میں مصروف، حکومت کا عدالت جانے کا عندیہ

نوازشریف نے مہنگائی کے جن کو بوتل میں بند کیا تھا،موجودہ حکومت نے اسے آزادکرکے آدم خوردیو میں بدل دیا۔نالائق، نااہل اورکرپٹ ٹولے کا 11000ارب کا قرض اژدہا بن کر معیشت اور عوام کو نگل رہا ہے۔

حکمران ٹولہ نہ صرف ملی بھگت سے کرپشن کررہا ہے بلکہ سنگدلی کی حد تک نالائق اور بے حس بھی ہے ،مہنگائی کے اس جہنم میں قوم بالخصوص غریب ترین لوگ کیسے زندہ رہیں گے؟۔

غریب بجلی گیس کے بل دے تو بچوں کی فیس رہ جاتی ہے، والدین کا علاج کرائے تو کھائے کیا؟،ظلم کی یہ انتہاقہرالٰہی کو دعوت دینے کے مترادف ہے۔غریب، بیروزگار خود کشی کررہے ہیں، سفید پوش طبقات کا عزت سے رہنا ناممکن بنادیاگیا ہے۔