اسلام آباد: سعودی عرب کی جانب سے پاکستان سمیت 6 ممالک کو براہ راست پروازوں کی اجازت دے دی گئی، اس کے علاوہ تین ارب ڈالر پاکستان کے اکاؤنٹ میں منتقلی کے قانونی معاملات مکمل کرلئے گئے ہیں، رقم اسی ہفتے اسٹیٹ بینک کے اکاؤنٹ میں منتقل کردی جائے گی۔
وفاقی وزیر اطلاعات فواد چوہدری نے ٹوئٹ میں کہا کہ تین اچھی خبریں سامنے آئی ہیں، اول پیٹرولیم ڈیلرز ایسوسی ایشن نے ہڑتال ختم کردی۔
دوم سعودی عرب نے پاکستان سے براہ راست فلائٹس شروع کرنے کا اعلان کردیا اور سعودی عرب سے تین ارب ڈالر کی پاکستان منتقلی سے متعلق تمام قانونی معاملات طے پاگئے ہیں اور یہ رقم اسی ہفتے پاکستان کو مل جائے گی۔
تین اچھی خبریں 1) پٹرولیم ڈیلرز ایسوسیشن ایشن نے ہڑتال ختم کر دی 2) سعودی عرب نے پاکستان سے براہ راست فلائٹس شروع کرنے کا اعلان کر دیا 3) سعودی عرب سے تین ارب ڈالر کی ٹرانسفر میں تمام قانونی معاملات طے ہوگئے اور یہ ڈالر اس ہفتے پاکستان کو مل جائینگے
— Ch Fawad Hussain (@fawadchaudhry) November 25, 2021
وزیراعظم عمران خان کے معاون خصوصی طاہر اشرفی نے کہا ہے کہ براہ راست فلائٹس نہ ہونے کی وجہ سے لاکھوں پاکستانی سعودی عرب جانے سے قاصر اور پریشانی کا شکار تھے اب ان کے لیے آسانی پیدا ہوجائے گی۔
طاہر اشرفی نے کہا کہ یہ فلائٹس مرحلہ وار کس طرح شروع ہوں گی یہ جلد معلوم ہوجائے گا، حکومت اس فیصلے پر سعودی فرماں رواں شاہ سلمان اور ولی عہد محمد بن سلمان کی شکرگزار ہے۔
مزید پڑھیں: پاکستان پیٹرولیم ڈیلرز ایسوسی ایشن کا ہڑتال ختم کرنے کا فیصلہ