اسلام آباد:پاکستان پٹرولیم ڈیلرز ایسوسی ایشن نے ملک بھر میں جاری ہڑتال ختم کرنے کا اعلان کردیا ہے۔
تفصیلات کے مطابق پاکستان پٹرولیم ڈیلرز ایسوسی ایشن نے جمعرات کے روز ملک بھر میں تمام پیٹرول پمپس بند رکھنے کا فیصلہ کیا تھا، جس کے بعد مختلف شہروں میں پٹرول پمپ بند رہے جس کے باعث عوام کو شدید مشکلات کا سامنا کرنا پڑا۔
جبکہ اب حکومت اور پٹرولیم ڈیلرز ایسوسی ایشن کے درمیان مذاکرات کے دوران معاہدہ طے پا گیا اور ڈیلر مارجن میں 99 پیسے فی لیٹر اضافے پر اتفاق کرلیا گیا ہے جبکہ پٹرولیم ڈویژن ،ای سی سی اور وفاقی کابینہ سے 99 پیسے اضافے کی منظوری لے گی۔
تین اچھی خبریں 1) پٹرولیم ڈیلرز ایسوسیشن ایشن نے ہڑتال ختم کر دی 2) سعودی عرب نے پاکستان سے براہ راست فلائٹس شروع کرنے کا اعلان کر دیا 3) سعودی عرب سے تین ارب ڈالر کی ٹرانسفر میں تمام قانونی معاملات طے ہوگئے اور یہ ڈالر اس ہفتے پاکستان کو مل جائینگے
— Ch Fawad Hussain (@fawadchaudhry) November 25, 2021
وفاقی وزیر اطلاعات فواد چودھری نے سماجی رابطے کی ویب سائٹ ٹوئٹر پر تصدیق کرتے ہوئے لکھا کہ پٹرولیم ڈیلرز ایسوسی ایشن نے ہڑتال ختم کردی ہے۔
یاد رہے کہ ہڑتال کے باعث زیادہ تر پیٹرول پمپوں پر پٹرول ناپید ہوگیا تھا، کئی جگہوں پر عوام کی بڑی تعداد پٹرول حاصل کرنے کے لئے طویل قطاروں میں اذیت کا شکا رہی۔
پی ایس او اور دیگر پیٹرول پمپس کھلے ہیں، عوام پریشان نہ ہوں۔وزارتِ پیٹرولیم