پاکستان کپ کا 9واں راؤنڈ مکمل، وسطی پنجاب سے خیبر پختونخوا کو شکست

راولپنڈی: وسطی پنجاب نےرضوان حسین کی سنچری کی بدولت خیبرپختونخوا کو 15 رنز سے ہراکر پاکستان کپ کے سیمی فائنل میں رسائی کی امیدیں روشن کرلی ہیں۔ سندھ، بلوچستان اور خیبرپختونخوا کی ٹیمیں پہلے ہی سیمی فائنل میں رسائی حاصل کرچکی ہیں۔

تفصیلات کے مطابق پنڈی کرکٹ اسٹیڈیم میں کھیلے گئے میچ میں خیبرپختونخوا کی ٹیم 267 رنز کے تعاقب میں مقررہ 50 اوورز میں 253 رنز پر پویلین لوٹ گئی۔ محمد سرور 43 رنز بناکر نمایاں رہے۔ قاسم اکرم نے 3 جبکہ حسین طلعت، ظفر گوہر اور فیضان نے 2،2 وکٹیں حاصل کیں۔

یہ بھی پڑھیں:

کیوی صحافی نے غیرملکیوں کوبٹوہ لے کر پاکستان نہ آنے کی تجویز کیوں دی؟

اس سے قبل اوپنر رضوان حسین کی 3 چھکوں اور 7 چوکوں پر مشتمل 104 رنز کی اننگز کی بدولت سینٹرل پنجاب نے مقررہ 50 اوورز میں 9 وکٹوں کے نقصان پر 268 رنز بنائے۔ سعد نسیم 48 رنز بناکر آؤٹ ہوئے۔ محمد عمران نے 4 اور عمران خان سینئر نے 2 کھلاڑیوں کو آؤٹ کیا۔

اقبال اسٹیڈیم فیصل آباد میں کھیلے گئے میچ میں بلوچستان نے ناردرن کوسنسنی خیز مقابلے کے بعد 7 رنز سے ہرادیا۔ 303 رنز کے تعاقب میں ناردرن کی ٹیم مقررہ 50 اوورز میں 6 وکٹوں کے نقصان پر 295 رنز بناسکی۔نوجوان وکٹ کیپر بیٹر روحیل نذیر نے 82 رنز کی اننگز کھیلی۔

اس سے قبل ٹیبل ٹوپر بلوچستان نے مقررہ 50 اوورز میں 5 وکٹوں کے نقصان پر 302 رنز بنائے تھے۔ اسد شفیق نے 12 چوکوں کی مدد سے 66 گیندوں پر 89 رنز کی اننگز کھیلی تھی۔ اوپنرز حسیب اللہ 58 اور عمران بٹ 54 رنز بناکر آؤٹ ہوئے۔ایاز تصور 43 رنز پر ناٹ آؤٹ رہے۔

ملتان کرکٹ اسٹیڈیم میں کھیلے گئے میچ میں سدرن پنجاب نے سندھ کو 46 رنز سے شکست دے دی۔ 315 رنز کے تعاقب میں سندھ کی پوری ٹیم 268 رنز پر ڈھیر ہوگئی۔ ضیاء الحق نے 3 اور سلمان علی آغا نے 2 وکٹیں حاصل کیں۔

اوپنر صائم ایوب 82 اور سہیل خان 44 رنز بناکر نمایاں رہے۔ فاتح ٹیم نے پہلے بیٹنگ کرتے ہوئے مقررہ 50 اوورز میں 6 وکٹوں کے نقصان پر 314 رنز بنائے تھے۔ عمران رندھاوا نے 48 گیندوں پر 4 چوکوں اور 4 چھکوں کی بدولت 71 رنز کی ناقابل شکست اننگز کھیلی۔

حسان خان بھی 48 گیندوں پر 8 چوکوں اور ایک چھکے کی مدد سے 66 رنز بناکر ناٹ آؤٹ رہے تھے۔ شرون سراج نے 57 اور طیب طاہر نے 46 رنز اسکور کیے۔ سہیل خان نے 3 کھلاڑیوں کو آؤٹ کیا۔ پاکستان کپ کا 9واں راؤنڈ اختتام پذیر ہوگیا ہے۔