امریکی تاریخ کے سیاہ ترین واقعات میں 22 نومبر 1963 کا دن آج بھی یاد کیا جاتا ہے جب امریکہ کے 35ویں صدر جان ایف کینیڈی کو ریاست ٹیکساس کے شہر ڈیلاس میں ایک عوامی دورے کے دوران فائرنگ کرکے قتل کر دیا گیا۔ اس وقت ان کی عمر صرف 46 برس تھی۔
صدر کینیڈی اپنی اہلیہ جیکولین کینیڈی کے ہمراہ کھلی چھت والی گاڑی میں ڈیلاس کی سڑکوں سے گزر رہے تھے کہ دوپہر تقریباً 12 بج کر 30 منٹ پر فائرنگ کا نشانہ بن گئے۔ حملے میں ٹیکساس کے گورنر جان کونالی بھی زخمی ہوئے۔ صدر کو فوری طور پر اسپتال منتقل کیا گیا تاہم ڈاکٹروں نے تقریباً آدھے گھنٹے بعد ان کی موت کی تصدیق کردی۔

واقعے کے بعد نائب صدر لنڈن بی جانسن نے اسی روز ایئر فورس ون میں امریکہ کے 36ویں صدر کی حیثیت سے حلف اٹھا لیا۔ اس غیر معمولی تقریب میں جیکولین کینیڈی بھی موجود تھیں۔
مشتبہ حملہ آور اور ایک اور قتل
تحقیقات کے دوران لی ہاروے اوسوالڈ کو مرکزی ملزم قرار دیا گیا جسے صدر پر حملے کے بعد پولیس اہلکار جے ڈی ٹپٹ کے قتل کے الزام میں بھی گرفتار کیا گیا تاہم 24 نومبر کو پولیس کی تحویل میں منتقلی کے دوران جیک روبی نامی شخص نے ٹیلی وژن کیمروں کے سامنے اسے گولی مار کر ہلاک کردیا۔

تدفین اور سازشی نظریات
25 نومبر کو صدر کینیڈی کی سرکاری تدفین آرلنگٹن نیشنل قبرستان میں مکمل فوجی اعزاز کے ساتھ کی گئی۔ تقریب میں دنیا کے 99 ممالک کے رہنماؤں نے شرکت کی۔ ان کی اہلیہ نے قبر پر دائمی شعلہ روشن کیا جو آج بھی ان کی یادگار ہے۔
1964 میں وارن کمیشن نے قرار دیا کہ اوسوالڈ نے اکیلے کارروائی کی تھی اور کسی بڑی سازش کے شواہد نہیں ملے تاہم 1978 میں امریکی ایوان نمائندگان کی خصوصی کمیٹی نے قتل میں سازش کے امکان کو مسترد نہیں کیا۔
چھ دہائیوں سے زائد عرصہ گزرنے کے باوجود جان ایف کینیڈی کا قتل امریکی تاریخ کا ایسا معمہ ہے جس پر بحث آج بھی جاری ہے۔
گوگل نیوز پر ہمیں فالو کریں








