گوگل نیوز پر ہمیں فالو کریںاسلام آباد: دنیا بھر میں آن لائن انسائیکلو پیڈیا سروس کے حوالے معروف ویب سائٹ وکی پیڈیا کو توہین آمیز مواد نہ ہٹانے پر پاکستان میں بلاک کر دیا گیا ہے۔
انتباہ کے باوجود توہین آمیز اور غیر قانونی مواد نہ ہٹانے پر پی ٹی اے نے وکی پیڈیا کو گزشتہ روز بلاک کیا، اس حوالے سے پی ٹی اے کے حکام نے تصدیق کردی ہے۔
پی ٹی اے حکام کے مطابق وکی پیڈیا کی سروس کی پاکستان میں دوبارہ بحالی کے حوالے سے توہین آمیز اور غیر قانونی مواد ہٹانے کے بعد ہی غور ہوسکتا ہے۔
پاکستان میں وکی پیڈیا کا استعمال کرنے والوں میں ایک بڑی تعداد اسکول، کالجوں اور یونیورسٹیوں میں زیر تعلیم طلبہ کی ہے، جو کہ اپنے مضمون سے متعلق بنیادی معلومات وکی پیڈیا سے ہی حاصل کرتے ہیں۔
پی ٹی اے حکام کا کہنا ہے کہ وکی پیڈیا کو بلاک کرنے سے قبل عدالتی احکامات پر ویب سائٹ سے توہین آمیز مواد نہ ہٹانے پر اسے ڈی گریڈ کیا گیا اور 48 گھنٹے کے لیے اس کی سروس کو آہستہ بھی کیا گیا۔
وکی پیڈیا کو پورا موقع فراہم کیا گیا کہ وہ اس حوالے سے اپنا مؤقف سامنے رکھتے ہوئے توہین آمیز مواد ویب سائٹ سے ہٹائے لیکن نہ تو مواد ہٹایا گیا اور نہ ہی وکی پیڈیا کے حکام پی ٹی اے کے سامنے پیش ہوئے۔
مزید پڑھیں:آئی ایم ایف کا تکنیکی سطح کے مذاکرات میں ڈومور کا مطالبہ
واضح رہے کہ یکم فروری کو پاکستان ٹیلی کمیونیکیشن اتھارٹی نے وکی پیڈیا کو انتباہ جاری کیا تھا کہ اگر ویب سائٹ سے توہین آمیز مواد نہ ہٹایا گیا تو وکی پیڈیا سروس کو ڈی گریڈ کرتے ہوئے اسے بلاک کر دیا جائے گا۔
