گوگل نیوز پر ہمیں فالو کریںمعروف اداکارہ نمرہ خان کی دوسری شادی بھی طلاق پر اختتام پذیر ہوگئی ہے۔ ان کے شوہر زین حامد نے سوشل میڈیا پر جاری ایک بیان میں طلاق کی تصدیق کرتے ہوئے بتایا کہ دونوں کے درمیان ذاتی نوعیت کے اختلافات پیدا ہوگئے تھے۔ اس کے علاوہ زندگی کے حوالے سے دونوں کی ترجیحات بھی مختلف تھیں، جس کے باعث یہ ازدواجی رشتہ برقرار نہ رہ سکا۔
تفصیلات کے مطابق اداکارہ نمرہ خان نے جون 2026 میں برطانیہ میں رہائش پذیر پائلٹ زین حامد سے شادی کی تھی۔ شادی کے بعد اداکارہ نے اپنی نئی زندگی کے آغاز پر خوشی کا اظہار کیا اور سوشل میڈیا پر وقتاً فوقتاً شوہر کے ساتھ تصاویر بھی شیئر کرتی رہیں۔ تاہم کچھ عرصے بعد نمرہ کے والد کی چند سوشل میڈیا پوسٹس سامنے آئیں، جن کے بعد ان کی ازدواجی زندگی کے بارے میں مختلف قیاس آرائیاں ہونے لگیں۔
سوشل میڈیا پر جاری قیاس آرائیوں کے دوران نمرہ خان نے اپنے مداحوں کو یقین دلایا کہ ان کی ازدواجی زندگی میں سب کچھ معمول کے مطابق ہے۔ انہوں نے بری نظر سے بچاؤ کا حوالہ دیتے ہوئے شادی سے متعلق تصاویر سوشل میڈیا سے ہٹا دی تھیں۔ اس کے ساتھ ہی انہوں نے کچھ ایسی تحریریں بھی شیئر کیں جنہیں ابتدائی طور پر سوشل میڈیا صارفین عمومی طور پر ان کے سابق شوہر کی طرف اشارہ سمجھ رہے تھے۔
اب زین حامد نے انسٹاگرام پر جاری اپنے بیان کے ذریعے نمرہ خان سے طلاق کی خبروں کی باضابطہ تصدیق کردی ہے۔ انہوں نے واضح کیا کہ انہوں نے 17 جولائی کو نمرہ خان سے علیحدگی اختیار کرلی ہے۔ ان کے مطابق اس فیصلے کی بنیادی وجوہات ذاتی اختلافات اور زندگی کے بارے میں دونوں کی مختلف ترجیحات تھیں، جن کے باعث یہ رشتہ مزید آگے نہ بڑھ سکا۔
زین حامد نے اپنے بیان میں یہ بھی واضح کیا کہ ان کا مقصد کسی شخص پر الزام عائد کرنا نہیں۔ انہوں نے اپنی ایک سابقہ سوشل میڈیا پوسٹ، جس میں انہوں نے سکون ملنے اور جان چھوٹنے کی بات کی تھی، کی وضاحت کرتے ہوئے کہا کہ یہ الفاظ سوشل میڈیا پر ہونے والی غیر ضروری پوسٹس اور اسٹیٹس کے ردعمل میں لکھے گئے تھے، نہ کہ کسی کو بدنام کرنے کے لیے۔
انہوں نے مزید کہا کہ ان کی نیت کبھی بھی کسی پر الزام لگانے کی نہیں رہی۔ زین حامد کے مطابق وہ معاشرے میں مردوں اور خواتین دونوں کو مساوی بنیادوں پر عزت کی نگاہ سے دیکھتے ہیں۔ انہوں نے اپنے بیان میں اس بات پر بھی زور دیا کہ وہ معاملے کو الزام تراشی یا تنازع کی شکل دینے کے بجائے احترام کے ساتھ ختم کرنا چاہتے ہیں اور غیر ضروری بحث سے گریز کرنا چاہتے ہیں۔
خیال رہے کہ نمرہ خان کا شمار پاکستان کی معروف ٹی وی اداکاراؤں میں ہوتا ہے اور وہ متعدد کامیاب ڈراموں میں اپنی اداکاری کے جوہر دکھا چکی ہیں۔ ان کے نمایاں ڈراموں میں اے مشتِ خاک، احرامِ جنوں، اڑان اور مہربانو جیسے ڈرامے شامل ہیں۔ انہوں نے چھوٹی سی زندگی، خوب سیرت اور باغی کے علاوہ امِ عائشہ میں اداکاری سے بھی عوام کی توجہ حاصل کی۔
