بھارتی اداکارہ وماڈل پونم پانڈے 32 سال کی عمر میں کینسر کے باعث فانی دنیا کو خیر باد کہہ گئیں۔
بھارتی میڈیا کا اس حوالے سے کہنا ہے کہ اداکارہ پونم پانڈے سروائیکل کینسر (رحم کے نچلے حصے کے کینسر) میں مبتلا تھیں۔
ان کی ٹیم کی جانب سے اداکارہ کی موت کی تصدیق ان کے انسٹاگرام اکاؤنٹ پر کی گئی ہے۔
پونم پانڈے کی موت کا اعلان ان کے انسٹاگرام اکاؤنٹ پر کیا گیا ہے جس میں درج ہے کہ ‘ آج کی صبح ہم سب کیلئے ایک مشکل ترین صبح ہے، اور ہمیں یہ بتاتے ہوئے بے حد دکھ ہورہا ہے کہ آپ سب کی پیاری پونم پانڈے سروائیکل کینسر کی وجہ سے اس دنیا سے کوچ کرگئی ہیں’۔
بھارتی میڈیا کے مطابق اداکارہ کو 2011 میں آئی سی سی ورلڈکپ کے دوران متنازعہ بیان کی وجہ سے شہرت ملی تھی بعدازاں انہوں نے مختلف فلموں اور رئیلیٹی شو میں بھی کام کیا، پونم پانڈے کی بالی وڈ فلموں میں نشہ، آگیا ہیرو شامل ہے۔