ریاض: وزیر خارجہ مخدوم شاہ محمود قریشی نے سعودی عرب کے دارالحکومت ریاض میں اپنے سعودی ہم منصب شہزادہ فیصل بن فرحان السعود سے ملاقات کی جس میں مشرق وسطیٰ کی صورتحال اور باہمی دلچسپی کے امور پرتبادلہ خیال کیا گیا۔
اپنے دورے کے دوسرے مرحلے میں وزیرخارجہ شاہ محمود قریشی سعودی عرب کے دارالحکومت ریاض پہنچےجہاں سعودی وزارت خارجہ کے ڈپٹی منسٹر آف پروٹوکول اعظم القین ، سعودی عرب میں پاکستان کے سفیر، راجہ علی اعجاز اور پاکستانی سفارت خانے کے سینئر حکام نے وزیر خارجہ کا پرتپاک خیرمقدم کیا ۔
وزیرخارجہ شاہ محمود قریشی نے اپنے سعودی ہم منصب شہزادہ فیصل بن فرحان السعود سے ملاقات کی جس میں مشرق وسطیٰ کی بگڑتی صورتحال سمیت باہمی دلچسپی کے اہم علاقائی و عالمی امور پر تفصیلی تبادلہ خیال کیا گیا۔
اس موقع پر وزیرخارجہ شاہ محمود قریشی کا کہنا تھا کہ مشرق وسطیٰ میں بڑھتی کشیدگی کو کم نہ کیا گیا تو یہ خطے کو اپنی لپیٹ میں لے سکتی ہے، کشیدگی پاکستان کے لیے باعث تشویش ہے کیونکہ اس سے افغان امن عمل متاثر ہو سکتا ہے۔
یہ بھی پڑھیں: ایران نے یوکرین طیارہ حادثے کے متاثرین کو ادائیگی پر رضا مندی ظاہر کردی