بھارتی فوج کی ایل او سی پر بربریت جاری، 3بچیوں کا باپ شہید

راولپنڈی: بھارتی فوج نے لائن آف کنٹرول پر ایک بار پھر بین الاقوامی قوانین کی دھجیاں اڑاتے ہوئے شہری آبادی پر شدید فائرنگ کی، جس کی زد میں آکر ایک33سالہ شہری اپنی زندگی کی بازی ہار بیٹھا۔

پاک فوج کے شعبہ تعلقات عامہ (آئی ایس پی آر) کے جاری کردہ بیان کے مطابق بھارتی فورسز نے کنٹرول لائن کے باغسر سیکٹر پر بلا اشتعال فائرنگ کی اور شہری آبادی کو نشانہ بنایا۔

#IndianArmy unprovoked CFV in Bagsar Sector along #LOC targeting civilian population. An innocent citizen, Ansar, age 33 years, father of 3 daughters was hit & embraced shahadat due to Indian indiscriminate fire while he was moving on Motorbike near his house in Garhi village.

— DG ISPR (@OfficialDGISPR) November 25, 2020

بھارتی فوج کی بربریت کے باعث 33 سالہ شہری انصر شہید ہو گیا۔ شہری انصر موٹر سائیکل پر اپنے گھر جا رہا تھا کہ بھارتی فوج کی اندھا دھند فائرنگ کا نشانہ بن گیا۔ شہید شہری تین بچیوں کا باپ تھا۔

واضح رہے کہ بھارت نے گزشتہ دنوں بھی اشتعال انگیزی کرتے ہوئے لائن آف کنٹرول کے کھوئی رٹہ سیکٹر پر جگجوٹ گاؤں میں شادی کی تقریب کو نشانہ بنایا تھا جس کے نتیجے میں 11معصوم شہری زخمی ہوگئے تھے۔

آئی ایس پی آر کے مطابق بھارتی فوج نے شادی کی تقریب کو راکٹوں اور بھاری مارٹرز سے نشانہ بنایا۔ زخمی ہونے والوں میں چھ خواتین اور چار بچے بھی شامل تھے۔

پاک فوج کی جانب سے جاری بیان میں کہا گیا ہے کہ شادی کی تقریب میں خاص طور پر خواتین بچوں کو نشانہ بنانا بھارتی فوج میں اخلاقیات کی کمی کی نشاندہی کرتا ہے۔ بھارتی فوج نے غیر پیشہ وارانہ اور انسانی حقوق کی صریحاً خلاف ورزی کا مظاہرہ کیا۔

مزید پڑھیں: لائن آف کنٹرول پر بھارتی فوج کی بلا اشتعال فائرنگ، 11 سالہ بچی شہید