کراچی:سائٹ ایسوسی ایشن آف انڈسٹری کے صدرسلیمان چاؤلہ نے حکومت کی جانب سے صنعتوں کی گیس بند کر کے ان کے حصے کی گیس کے الیکٹرک کو دینے کے فیصلے پرشدید احتجاج کرتے ہوئے فیصلہ فوری واپس لینے کا مطالبہ کیا ہے۔
انہوں نے وزیراعظم عمران خان اور وزیراعلیٰ سندھ سید مراد علی شاہ سے صنعتوں کو تباہی سے بچانے کی اپیل کرتے ہوئے کہا کہ رات میںبجلی بند اور دن میںگیس بندہوگی تو حکومت بتائے کہ صنعتیں کیسے چلائیں؟۔
سلیمان چاؤلہ نے کہاکہ حکومت نے تمام صنعتوں کو جمعہ ، ہفتہ اوراتوار گیس نہ دینے کا فیصلہ کیا ہے جوکہ ناقابل قبول ہے بلکہ کسی صورت بھی ملکی مفاد میں نہیں کیونکہ صنعتوں کو بنیادی توانائی کی فراہمی معطل ہونے سے پیداواری سرگرمیاں بری طرح متاثر ہوں گی جس کے ملکی برآمدات پر بھی منفی اثرات مرتب ہوں گے۔صنعتوں کی گیس کے الیکٹرک کو دینے کے حکومتی فیصلے سے صنعتوں کو شدید نقصان ہوگا۔
انہوں نے کہاکہ صنعتوں کی گیس کے الیکٹرک کو دینے کا حکومتی فیصلے کو کراچی کے صنعتکاروں کے ساتھ ناانصافی ہے حالانکہ ہونا تو یہ چاہیے تھا کہ حکومت کراچی میں جاری بدترین لوڈشیڈنگ کا حقیقی معنوں میں نوٹس لیتے ہوئے کے الیکٹرک کے خلاف سخت کارروائی عمل میں لاتی مگر افسوس کہ نئے پاکستان میں بھی سہ ماہی ایڈجسٹمنٹ کے نام پر کے الیکٹرک کو کراچی والوں سے لوٹ مار کا لائسنس دے دیا گیا جو کہ کراچی والوں کے ساتھ انتہائی ظلم ہے۔
صدر سائٹ ایسوسی ایشن نے مزیدکہاکہ صنعتوں کی کبھی بجلی بند تو کبھی گیس بند،اگرحکومت صنعتیںبند کرنا چاہتی ہے تو بتادے ہم اپنی فیکٹریوں کی چابیاں کے الیکٹرک اور سوئی سدرن گیس کو دے دیں گے۔
مزید پڑھیں:کراچی میں بجلی کابحران ختم کرنے کیلئے کے الیکٹرک کو گیس کی فراہمی میں اضافہ