لاہور:معروف میوزک سروس اسپاٹیفائے پر پاکستانی گلوکار عاصم اظہر کے مشہور گانے ’جو تو نہ ملا‘ نے نیا سنگ میل عبور کرتے ہوئے 100 ملین سے زائد اسٹریمز حاصل کرلیں۔
عاصم اظہر نے انسٹاگرام پر اپنے گانے کے نئے اعزاز پر جہاں اپنے چاہنے والوں کا شکریہ ادا کیا وہیں انہوں گانے کا اسپیشل ورژن شیئر کرکے مداحوں کو سرپرائز بھی دیا ہے۔
پاکستان گلوکار نے اپنے نئے گانے کی خوبصورت شاعری کیلئے کنال ورما کو کریڈٹ دیتے ہوئے ان کو خراج تحسین بھی پیش کیا۔
عاصم اظہر کا گانا ’جو تو نہ ملا‘ 2018 کو ریلیز کیا گیا تھا اور اس نے دو برس میں ہی یوٹیوب پر سو ملین ویوز سمیٹ لئے تھے اور اس سے گلوکار کو پوری دنیا میں شہرت ملی۔
یاد رہے کہ یہ وہی گانا ہے جس کی بنا پر عاصم اظہر پر سرقہ کا الزام عائد کیا گیا تھا،پاکستانی گلوکار نے وضاحت دی کہ موسیقی کے حقوق قانونی طریقے سے حاصل کیے گئے تھے۔