گوگل نیوز پر ہمیں فالو کریںمیٹا کی زیرِ ملکیت مقبول ایپلی کیشن واٹس ایپ جلد ہی کاروباری اداروں کے لیے ایسی نئی سہولیات متعارف کرانے جا رہی ہے جو انہیں اس پلیٹ فارم کے ذریعے آمدن حاصل کرنے کے قابل بنائیں گی۔
آنے والے مہینوں میں اپ ڈیٹس نامی ٹیب کو کمرشل بنیادوں پر استعمال کے قابل بنایا جائے گا۔ اس ٹیب کے ذریعے صارفین پہلے ہی کاروباری اداروں، میڈیا چینلز اور مشہور شخصیات کی پوسٹس فالو کرتے ہیں تاہم اب میٹا اس فیچر کو آمدن کا ذریعہ بنانے کا ارادہ رکھتی ہے۔
اس منصوبے کا مرکزی نکتہ ایک نیا سبسکرپشن ماڈل ہے جس کے تحت چینل ایڈمنز اپنے فالوورز کو خصوصی مواد مہیا کر سکیں گے جس کے بدلے میں وہ ماہانہ بنیادوں پر سبسکرپشن فیس وصول کریں گے۔
میٹا کی وائس پریذیڈنٹ آف پراڈکٹ مینجمنٹ، نکِیلا سری نواسن کے مطابق یہ فیچر چینل مالکان کو یہ سہولت دے گا کہ وہ اپنے سب سے متحرک فالوورز کو مخصوص اور بروقت اپ ڈیٹس فراہم کریں اور اسی دوران آمدن بھی حاصل کریں۔
ترجمان میٹا نے وضاحت کی ہے کہ واٹس ایپ چینلز تک عمومی رسائی بدستور مفت رہے گی تاہم ایڈمنز کو اجازت دی جائے گی کہ وہ ایک مقررہ قیمت کی حد میں رہتے ہوئے سبسکرپشن فیس چارج کر سکیں۔
سبسکرپشن کے علاوہ چینل مالکان کو پوسٹس کو پروموٹ کرنے اور میٹا کے ایڈز منیجر کے ذریعے اشتہارات چلانے کی بھی سہولت میسر ہو گی۔
فیس بک اور انسٹاگرام کی طرح یہ ٹول کاروباری اداروں کو اپنی مارکیٹنگ حکمت عملی کے مطابق اشتہاری بجٹ ترتیب دینے کی اجازت دیتا ہے۔
واضح رہے کہ پہلے ہی کئی کاروباری ادارے صارفین سے رابطہ مضبوط بنانے کے لیے واٹس ایپ کا استعمال کر رہے ہیں۔
مئی میں شائع ہونے والے ایک سروے کے مطابق معروف ریٹیل برانڈز جیسے جان لیوس ، نیکسٹ ، بی اینڈ کیو اور ایم اینڈ ایس اس پلیٹ فارم کو بڑھتی ہوئی صارف توقعات کو پورا کرنے کے لیے اکثر اوقات چیٹ بوٹس کے ذریعے استعمال کر رہے ہیں۔
