عدم اعتمادکامیاب، پرانے پاکستان میں سب کو خوش آمدید کہتا ہوں۔بلاول

اسلام آباد: چیئرمین پیپلز پارٹی بلاول بھٹو زرداری نے وزیر اعظم کے خلاف تحریکِ عدم اعتماد کامیاب ہونے پر ردِ عمل دیتے ہوئے کہا ہے کہ پرانے پاکستان میں سب کو خوش آمدید کہتا ہوں۔

تفصیلات کے مطابق چیئرمین پی پی پی بلاول بھٹو زرداری نے وزیر اعظم عمران خان کے عہدے سے ہٹنے پر اپنے ایک بیان میں کہا کہ پورے پاکستان اور قومی اسمبلی کو مبارکباد دینا چاہتا ہوں۔

یہ بھی پڑھیں:

عمران خان وزیراعظم ہاؤس سے بنی گالا روانہ

گزشتہ روز کی قومی اسمبلی کی کارروائی پر تبصرہ کرتے ہوئے چیئرمین پی پی پی نے کہا کہ یہ ایک تاریخی موقع ہے جب پاکستان میں پہلی بار تحریکِ عدم اعتماد کامیاب ہوئی ہے۔ پرانے پاکستان میں سب کو خوش آمدید کہتے ہیں۔

اپنی والدہ بے نظیر بھٹو شہید کا ذکر کرتے ہوئے بلاول بھٹو زرداری نے کہا کہ محترمہ 10 اپریل 1986 کو ضیاء الحق کے خلاف جدوجہد کیلئے لاہور آئی تھیں۔ آج 10 اپریل 2022 ہے، پرانے پاکستان کا خیر مقدم کرتا ہوں۔

قومی اسمبلی کے متعلق بلاول بھٹو زرداری نے کہا کہ میں 3سال سے اس ہاؤس کا ممبر ہوں۔ اس عرصے میں جتنا سیکھا، شاید زندگی بھر نہیں سیکھا۔ نوجوانوں سے اتنا کہنا چاہوں گا کہ کچھ بھی ناممکن نہیں ہے۔

چیئرمین پی پی پی بلاول بھٹو زرداری نے وزیر اعظم عمران خان اور تحریکِ انصاف کی حکومت  کے خاتمے پر خوشی کا اظہار کرتے ہوئے کہا کہ ظلم ظلم ہوتا ہے، بڑھتا ہے تو مٹ جاتا ہے جبکہ جمہوریت بہترین انتقام ہے۔