گوگل نیوز پر ہمیں فالو کریںاسلام آباد: وزیرِ اعظم پاکستان عمران خان نے آٹے اور چینی کے بحران کے ذمہ داروں کے حوالے سے رپورٹ منظر عام پر لانے کے بعد کہا ہے کہ کسی کو عوام کے پیسے پر ناجائز منافع خوری کی اجازت نہیں دیں گے۔
سماجی رابطے کی ویب سائٹ ٹوئٹر پر اپنے پیغام میں وزیرِ اعظم پاکستان عمران خان نے کہا کہ آٹے اور چینی کے بحران کے ذمہ داروں کا پتہ چلانے کے لیے ہمیں تفصیلی فارنزک رپورٹ کا انتظار ہے جو 25 اپریل کو سامنے آ جائے گی۔
پیغام میں وزیرِ اعظم عمران خان نے کہا کہ رپورٹ پر ہائی پاورڈ کمیشن کام کر رہا ہے جس کے 25 اپریل کو سامنے آنے کے بعد ایکشن لیا جائے گا۔ کسی بھی طاقتور لابی کو عوام کے پیسے سے نفع کمانے کی اجازت نہیں دی جائے گی۔
وزیرِ اعظم عمران خان نے کہا کہ حکومت نے اپنے وعدے کے مطابق آٹے اور چینی بحران کے ذمہ داران کی ابتدائی رپورٹس کو قطع و برید اور تبدیلی کیے بغیر مشتہر کیا جو پاکستان کی تاریخ میں پہلی بار کیا گیا ہے۔
انہوں نے کہا کہ گزشتہ سیاسی رہنماؤں نے اپنے ذاتی مفادات اور ملی بھگت کے باعث یہ اخلاقی جرات کھو دی تھی کہ اس طرح کی کسی رپورٹ کو تیار کرنے کا حکم دیتے یا انہیں مشتہر کرنے کیلئے اقدامات اٹھائے جاتے۔ یہ تحریکِ انصاف کی حکومت کا کارنامہ ہے۔
I await the detailed forensic reports now by the high-powered commission, which will come out on 25 April, before taking action. InshaAllah, after these reports come out no powerful lobby will be able to profiteer at the expense of our public.
— Imran Khan (@ImranKhanPTI) April 5, 2020
یاد رہے کہ اس سے قبل گورنر سندھ عمران اسماعیل نے کہا کہ وزیرِ اعظم عمران خان نے آٹے اور چینی کے بحران کے ذمہ داروں کی رپورٹ کو جس طرح مشتہر کیا، یہ ایک بے مثال کارنامہ ہے۔
ٹوئٹر پر اپنے پیغام میں گورنر سندھ عمران اسماعیل نے کہا کہ رپورٹ مشتہر کرکے وزیرِ اعظم عمران خان نے تاریخ رقم کردی۔ گزشتہ ادوارِ حکومت میں اس کی کوئی مثال دستیاب نہیں۔
مزید پڑھیں: چینی کے بحران کی رپورٹ بے مثال کارنامہ ہے۔گورنر سندھ
