بابائے قوم قائدِ اعظم محمد علی جناح کا 145واں یومِ پیدائش آج منایاجارہا ہے

اسلام آباد: بابائے قوم قائدِ اعظم محمد علی جناح کا 145واں یومِ پیدائش آج ملی جوش و جذبے سے منایا جارہا ہے، بانئ پاکستان نے آزادئ پاکستان سے قبل عوام میں اتحاد و یگانگت پیدا کرکے ایک نئی قوم بنا دیا۔

تفصیلات کے مطابق رواں برس بھی قائدِ اعظم کے یومِ پیدائش کے موقعے پر عام تعطیل کا اعلان کیا گیا۔ ملک بھر میں بابائے قوم کو خراجِ عقیدت پیش کرنے کیلئے مختلف تقاریب، ریلیوں اور جلسے جلوس کا اہتمام کیا جائے گا۔

یہ بھی پڑھیں:

توہینِ رسالت سے متعلق روسی صدر کے بیان کا خیر مقدم کرتا ہوں۔وزیر اعظم

چیف جسٹس کا احسن اقدام، پہلی خاتون جج کی تعیناتی جلد متوقع

بانئ پاکستان قائدِ اعظم نے 25 دسمبر 1876 کے روز کراچی میں آنکھ کھولی۔ ابتدائی تعلیم 1882 میں شروع ہوئی جبکہ اعلیٰ تعلیم کا آغاز 1893 میں انگلینڈ روانگی سے ہوا۔ 1896 تک محمد علی جناح وکالت کا امتحان پاس کرکے بیرسٹر بن چکے تھے۔

وطن واپسی کے بعد 1906 میں قائدِ اعظم کانگریس میں شامل ہوئے تاہم وقت گزنے کے ساتھ آپ کو احساس ہوتا چلا گیا کہ ہندو اور مسلمان ایک نہیں ہوسکتے۔ 1913 میں آپ نے آل انڈیا مسلم لیگ میں شمولیت اختیار کر لی تھی۔

آگے چل کر 1928 میں قائد اعظم نے 14 نکات پیش کیے جو مسلمانوں کے سیاسی حقوق کی تحفظ کی بنیاد قرار پائے۔ 1940 میں قراردادِ پاکستان کی منظوری سے لے کر 1947 میں ایک الگ وطن کے حصول تک قائدِ اعظم کی قیادت ولولہ انگیز رہی۔

قیامِ پاکستان کے بعد قائدِ اعظم زیادہ عرصہ زندہ نہ رہ سکے اور ملک کے پہلے گورنر جنرل کے طور پر خدمات سرانجام دیتے ہوئے شدید محنت کی۔ 1930 میں ہی قائدِ اعظم تپ دق (ٹی بی) میں مبتلا ہو گئے تھے جو 1948 میں جان لیوا ثابت ہوئی۔

ملک کے پہلے گورنر جنرل قائدِ اعظم محمد علی جناح کے 11 ستمبر 1948 کو انتقال کی خبر قوم کے ہر نوجوان اور بڑے بوڑھے کے دل پر بجلی بن کر گری۔ زندگی کے آخری ایام بانئ پاکستان نے زیارت میں گزارے جسے آج کل قائدِ اعظم ریزیڈنسی کہا جاتا ہے۔