انسٹاگرام اور فیس بک نے بھی بلیوٹک کیلئے ماہانہ فیس کی وصولی شروع کردی

مائیکرو بلاگنگ ویب سائٹ ٹوئٹر کے بعد میٹا نے بھی بلیو ٹک کے لئے ماہانہ فیس کی وصولی شروع کردی۔

میٹا نے اپنے دو پلیٹ فارمز فیس بک اور انسٹاگرام پر بلیو ٹک کے لیے پیسوں کی وصولی شروع کردی ہے۔ کمپنی نے ابتدائی طور پر امریکا میں اپنے صارفین کیلئے ماہانہ رقم کے بدلے اس سروس کا آغاز کیا ہے، اگر آپ ویب پر سائن اپ کرتے ہیں تو آپ کو ہر ماہ 11.99 ڈالر اور موبائل ایپ اسٹور سے سائن اپ کرتے ہیں، تو آپ کو 14.99 ڈالر ماہانہ ادا کرنے ہوں گے۔

ااگر آپ ویب پر سائن اپ کرتے ہیں تو آپ کو بلیو چیک مارک صرف فیس بک پر ہی ملے گا، لیکن موبائل ایپ اسٹور کے ذریعے سائن اپ کرنے والوں کو فیس بک اور انسٹاگرام دونوں پر بلیو چیک مارک ملے گا۔

یہ بھی پڑھیں:

ڈونلڈ ٹرمپ 2سال بعد یوٹیوب اور فیس بک پر واپس آگئے

واضح رہے کہ انسٹاگرام میں اب تک صرف میڈیا ہاؤسز، مشہور شخصیات اور سیاستدانوں کے اکاؤنٹس ہی تصدیق شدہ ہوا کرتے تھے لیکن اس حوالے سے میٹا نے اپنے قواعد میں تبدلی کی ہے۔

انسٹاگرام پر بلیو ٹِکس خریدنے کے لیے آپ کی عمر 18 سال ہونی چاہیے، آپ کو اپنا فوٹو آئی ڈی جمع کروانا ہوگا اور تصدیقی عمل سے گزرنا ہوگا۔

میٹا پر آپ کی تصدیق ہو جانے کے بعد آپ کے لیے پروفائل کا نام یا ڈسپلے نام یا پروفائل پر کوئی اور معلومات تبدیل کرنا آسان نہیں ہوگا، آپ کو دوبارہ تصدیقی عمل سے گزرنا پڑے گا۔