گوگل نیوز پر ہمیں فالو کریںپاکستان مسلم لیگ (ن) کے سینیٹر افنان اللہ خان نے سٹی پولیس آفیسر (سی پی او) راولپنڈی حسن مشتاق سکھیرا پر مبینہ طور پر جعلی ایف آئی آر درج کرنے اور کرپشن کے الزامات عائد کیے ہیں تاہم راولپنڈی پولیس نے ان الزامات کو بے بنیاد اور حقائق کے منافی قرار دیتے ہوئے مسترد کردیا ہے۔
سینیٹر افنان اللہ خان نے سماجی رابطے کی ویب سائٹ ایکس پر جاری اپنے بیان میں سی پی او راولپنڈی حسن مشتاق سکھیرا کو شدید تنقید کا نشانہ بنایا۔
سی سی پی او راولپنڈی حسن مشتاق پیسے لے کر جھوٹی ایف آئی آر کاٹ رہا ہے۔ اس کرپٹ افسر نے کرپشن کے سارے ریکارڈ تھوڑ دیے ہیں۔ ایک شخص پر جھوٹی ایف آہی آر کاٹ کر پریشر ڈالا جاتا ہے اور پھر اس سے پیسے بھٹورے جاتے ہیں۔ اس طرح کا ایک کیس یہ نیچے ایف آئی آر میں بھی ہے۔ @OfficialDPRPP pic.twitter.com/aZ6ILd3WCA
— Senator Dr. Afnan Ullah Khan (@afnanullahkh) September 25, 2026
ان کا کہنا تھا کہ حسن مشتاق سکھیرا نے مبینہ کرپشن کے تمام ریکارڈ توڑ دئیے ہیں۔ سینیٹر کے مطابق ایک شخص کے خلاف مبینہ طور پر جھوٹی ایف آئی آر درج کرکے اس پر دباؤ ڈالا جاتا ہے اور بعد ازاں اس سے رقم وصول کی جاتی ہے۔
دوسری جانب راولپنڈی پولیس نے سینیٹر افنان اللہ خان کے الزامات کی تردید کرتے ہوئے انہیں قطعی بے بنیاد اور حقائق کے برعکس قرار دیا ہے۔
سینیٹر افنان اللہ کی طرف سے ٹویٹ قطعی بے بنیاد اور حقائق کے برعکس ہے۔ مذکورہ کیس تھانہ واہ کینٹ سے متعلقہ ہے جس میں مدعی مقدمہ نے ایف آئی آر کی درخواست دی جس کی دریافت متعلقہ ایس پی کی زیر نگرانی عمل مٰیں آئی۔ حالات وقوعہ تصدیق طلب تھے تاہم مدعی کی میڈیکو لیگل رپورٹ کے مطابق https://t.co/gDYFNYv2Ch
— Rawalpindi Police (@RwpPolice) September 26, 2026
راولپنڈی پولیس نے ایکس پر اپنے ردعمل میں وضاحت کی کہ زیرِ بحث معاملہ تھانہ واہ کینٹ سے متعلق ہے جہاں مدعی مقدمہ کی جانب سے ایف آئی آر کے اندراج کے لیے درخواست دی گئی تھی۔ پولیس کے مطابق درخواست پر متعلقہ ایس پی کی نگرانی میں کارروائی کی گئی۔
پولیس کا کہنا ہے کہ واقعے کے حالات کی مزید تصدیق درکار تھی تاہم مدعی کی میڈیکو لیگل رپورٹ کی بنیاد پر مقدمہ درج کیا گیا۔
پولیس حکام کے مطابق انصاف کے تقاضے پورے کرنے اور حقائق تک پہنچنے کے لیے الزام علیہان کی گرفتاری فی الحال موخر رکھی گئی تاکہ میرٹ پر تفتیش مکمل کرکے معاملے کا فیصلہ کیا جاسکے۔
راولپنڈی پولیس نے اپنے بیان میں کہا کہ وہ سینیٹر افنان اللہ خان کی جانب سے کیے گئے بے بنیاد اور بغیر تحقیق الزامات کی سختی سے تردید کرتی ہے۔
