گوگل نیوز پر ہمیں فالو کریںپی ٹی اے کے زونل دفتر لاہور نے نیشنل سائبر کرائم انویسٹی گیشن ایجنسی کے تعاون سے گوجرانوالہ میں غیر قانونی آئی ایم ای آئی میں رد و بدل اور کلون شدہ/پیچڈ موبائل ڈیوائسز کی فروخت کے خلاف دو کامیاب چھاپے مارے۔
جاری اعلامیے کے مطابق پہلا چھاپہ ماڈل ٹاؤن میں واقع گوگل ویلی موبائل پلازہ پر مارا گیا، جہاں 19 چھیڑ چھاڑ شدہ یا کلون شدہ فون برآمد کیے گئے اور دکان کے مالک کو گرفتار کر لیا گیا۔
دوسرا چھاپہ مین مارکیٹ گوجرانوالہ میں موسیٰ موبائل پر مارا گیا، جہاں سے 6 چھیڑ چھاڑ شدہ ڈیوائسز ضبط کی گئیں۔ تاہم دکان کا مالک موقع پر موجود ہجوم کا فائدہ اٹھا کر فرار ہونے میں کامیاب ہو گیا۔
ضبط شدہ فونز میں سے ایک ڈیوائس کی آئی ایم ای آئی ڈزنی موبائل سے منسلک تھی، جو پاکستان میں باضابطہ طور پر دستیاب برانڈ نہیں ہے۔ برآمد شدہ فونز میں گوگل پکسل، ون پلس، موٹرولا اور سام سنگ S23 الٹرا جیسے ماڈلز شامل تھے، جن کی آئی ایم ای آئی کم قیمت ڈیوائسز سے تبدیل کی گئی تھی۔
ان کارروائیوں کے بعد ملزمان کے خلاف مقدمات درج کر لیے گئے ہیں اور تحقیقات جاری ہیں۔ بیان کے مطابق پی ٹی اے موبائل ڈیوائسز کے شناختی نمبروں میں غیر قانونی تبدیلی کے خلاف زیرو ٹالرنس پالیسی پر عمل پیرا ہے۔
بیان کے مطابق آئی ایم ای آئی میں چھیڑ چھاڑ اور کلون شدہ فونز کی ترسیل قومی سلامتی اور عوامی تحفظ کے لیے سنگین خطرہ ہیں، کیونکہ یہ جرائم پیشہ افراد کو شناخت چھپانے، سائبر کرائم، مالیاتی فراڈ، اغوا اور دیگر جرائم میں مدد فراہم کرتے ہیں۔
پی ٹی اے نے عوام سے اپیل کی ہے کہ وہ موبائل فون کلوننگ یا آئی ایم ای آئی میں چھیڑ چھاڑ سے متعلق کسی بھی مشکوک سرگرمی کی اطلاع دیں۔ پی ٹی اے کے مطابق ریگولیٹری کارروائیاں مزید سخت کی جا رہی ہیں اور قوانین کی خلاف ورزی کرنے والوں کو سخت قانونی نتائج کا سامنا کرنا پڑے گا۔
