گوگل نیوز پر ہمیں فالو کریںکراچی: آرچ بشپ کراچی بشپ بینی ماریو ٹریوس اورقومی کمیشن برائے امن و انصاف کے ڈائریکٹر ریورنڈ فادرآشر لیاقت نے پشاور میں پادری کے قتل وساتھی کے زخمی ہونے کے واقعہ کی شدید مذمت کرتے ہوئے کہا ہے کہ مسیحی آپس میں اتحاد برقراررکھیں اورحکومت مسیحیوں کی سیکورٹی یقینی بنائے۔
آرچ بشپ کراچی بشپ بینی ماریو ٹریوس کاکہنا ہے کہ ہم پادری پیٹرک نعیم اور ساتھی ولیم سراج پر حملے کی شدید مذمت اورمتاثرہ مسیحی پادریوں کے اہل خانہ سے یکجہتی کا اظہار کرتے ہیں۔
ڈائریکٹر قومی امن و انصاف کمیشن ریورنڈ فادرآشر لیاقت کا کہنا ہے کہ پادریوں پر حملے نے پاکستان میں تمام مسیحی برادری کو تشویش میں مبتلا کردیا ہے۔ جو لوگ بھی اس واقعے میں ملوث ہیں، انہیں جلد سے جلد گرفتار کیا جائے، اور سزا دی جائے تاکہ انصاف کا بول بالا ہوسکے۔
مزید پڑھیں:سانحہ سیالکوٹ ریاست کیلئے نیا امتحان
آرچ بشپ اور ڈائریکٹر قومی کمیشن کا مشترکہ بیان میں کہنا ہے کہ واقعے سے مسیحی برادری میں بے چینی پائی جاتی ہے جس سے پاکستان میں مذہبی ہم آہنگی بھی متاثر ہوئی ہے۔ دونوں مسیحی رہنماؤں نے چرچ آف پاکستان کے اراکین سے ہمدردی اور اہل خانہ سے یکجہتی کا اظہار کیا۔
آرچ بشپ نے مسیحی برادری کو اپنی صفوں میں اتحاد برقرار رکھنے اور جاں بحق اور زخمی پادریوں کودعاؤں میں یاد رکھنے کی ہدایت کی۔ انہوں نے واقعے پر حکومت سے فوری اور سخت ایکشن لینے اور قاتلوں کی گرفتاری کا مطالبہ کرتے ہوئے کہا کہ حکومت کو مسیحیوں سمیت تمام اقلیتوں کی سیکورٹی یقینی بنانا ہوگی۔
واضح رہے کہ پشاور میں اتوار کو نامعلوم موٹر سائیکل سواروں کی فائرنگ سے ایک پادری ولیم سراج موقع پر ہلاک جبکہ ان کے ساتھی پیٹرک نعیم زخمی ہو گئے تھے۔
گل بہار پولیس اسٹیشن نے بتایا کہ فائرنگ کا یہ واقعہ پشاور میں رنگ روڈ پر واقع مدینہ مارکیٹ کے پاس دوپہر ڈیڑھ بجے کے قریب اس وقت پیش آیا جب دونوں پادری شہیدان آل سینٹ چرچ میں عبادات ختم ہونے کے بعد گھر جا رہے تھے۔
