گوگل نیوز پر ہمیں فالو کریںآپ اپنے موبائل یا میک پر ایپس ڈھونڈتے ہیں تو اب یہ کام پہلے سے زیادہ آسان اور ذاتی نوعیت کا ہو جائے گا۔ امریکی ٹیکنالوجی کمپنی اپیل انٹرنیشنل نے اپنے ایپ اسٹور میں کئی نئے فیچرز شامل کیے ہیں جن کا مقصد صارفین کو بہتر ایپ سفارشات دینا اور ڈویلپرز کو اپنی ایپس دکھانے کے زیادہ جدید طریقے فراہم کرنا ہے۔
نئے فیچرز میں سب سے نمایاں اضافہ پرسنلائزڈ کلیکشنز ہے جو صارف کی دلچسپیوں اور اس کے استعمال کے پیٹرن کو دیکھتے ہوئے اس کے لیے موزوں ایپس اور گیمز تجویز کرتا ہے۔ اس کے ساتھ App Notes بھی شامل کیے گئے ہیں جو یہ وضاحت فراہم کرتے ہیں کہ کسی مخصوص ایپ کو سفارشات میں کیوں دکھایا جا رہا ہے تاکہ صارف کو بہتر سمجھ آ سکے۔
یہ ذاتی نوعیت کی تجاویز App Store کے Apps، Games اور Search ٹیبز میں نظر آئیں گی اور وقت کے ساتھ ساتھ بدلتی رہیں گی، کیونکہ سسٹم صارف کی نئی سرگرمیوں اور ڈاؤن لوڈز کو مسلسل سیکھتا رہے گا۔ فی الحال یہ فیچر صرف امریکہ میں انگریزی زبان کے صارفین کے لیے دستیاب ہے تاہم مستقبل میں اسے دیگر ممالک اور زبانوں تک توسیع دینے کا منصوبہ موجود ہے۔
ڈویلپرز کے لیے App Store Connect میں ایک نیا فیچر Creative Assets بھی شامل کیا جا رہا ہے۔ اس کے ذریعے ایپ کے پروڈکٹ پیجز اور سرچ نتائج میں زیادہ جدید اور متحرک تصاویر اور ویڈیوز دکھائی جا سکیں گی جو روایتی اسکرین شاٹس اور پریویو ویڈیوز سے کہیں زیادہ موثر انداز میں ایپ کو پیش کریں گی۔
یہ Creative Assets نہ صرف ایپ کی نمائش کو بہتر بناتے ہیں بلکہ ڈویلپرز کو یہ سہولت بھی دیتے ہیں کہ وہ اپنی موسمی مہمات، نئی اپڈیٹس یا برانڈ شناخت کو زیادہ واضح اور تخلیقی انداز میں پیش کر سکیں۔ مزید یہ کہ یہ نظام کسٹم پروڈکٹ پیجز اور موجودہ آپٹیمائزیشن ٹولز کے ساتھ بھی منسلک ہے جس سے ٹیسٹنگ اور پروموشن کے عمل میں مزید سہولت پیدا ہوتی ہے۔
Mac App Store میں بھی اہم تبدیلی کی گئی ہے جس کے تحت اب ایپس اور گیمز کے لیے Intel سپورٹ لازمی نہیں رہی۔ اس تبدیلی کے بعد ڈویلپرز صرف Apple silicon پر مبنی ورژن جاری کر سکتے ہیں جس سے جدید میک ڈیوائسز کے لیے ڈویلپمنٹ کا عمل مزید آسان اور تیز ہو گیا ہے۔
ڈویلپرز کے لیے ایپ ریویو کے عمل کو بھی بہتر بنایا گیا ہے اور اب ایک ہی App Review میں متعدد In-App Purchases شامل کیے جا سکتے ہیں۔ اس سے پہلے ہر خریداری کے آئٹم کو الگ الگ جمع کروانا پڑتا تھا جس سے وقت اور محنت دونوں زیادہ لگتے تھے۔
