کراچی میں کل بارش، ٹھنڈی ہوائیں، سردی بڑھنے کا امکان

کراچی:محکمہ موسمیات ارلی وارننگ سینٹر نے شہر میں کل ہلکی بارش اوربونداباندی کا امکان ظاہر کرنے کے ساتھ موسم سرد رہنے کی پیشگوئی کی ہے۔

کراچی کے مختلف علاقوں میں بوندا باندی اور کہیں کہیں ہلکی بارش کی پیش گوئی کی گئی ہے۔محکمہ موسمیات کے مطابق پیرکوشہرکا موجودہ درجہ حرارت 18 ڈگری سینٹی گریڈ جبکہ ہوا میں نمی کا تناسب 85 فیصد ریکارڈ کیا گیا۔

محکمہ موسمیات کے مطابق شہر میں اگلے 24گھنٹوں کے دوران مختلف سمتوں کی ہوائیں چل سکتی ہیں۔ ابتدا میں بلوچستان کی شمال مغربی اوربعدمیں سمندری ہوائیں چل سکتی ہیں۔

مزید پڑھیں:سندھ ہائیکورٹ برنس روڈ کی بندش پر برہم، حکومت سے جواب طلب کرلیا

اگلے 24گھنٹوں کے دوران شہر کا کم سے کم پارہ 16سے18ڈگری کے درمیان رہنے کا امکان ہے، جب کہ زیادہ سے زیادہ درجہ حرارت 24سے26ڈگری کے درمیان رہ سکتا ہے۔

واضح رہے کہ کراچی میں دو روز سے موسم معتدل ہے اور بعض علاقوں میں درجہ حرارت 26 تک ریکارڈ کیا گیا تاہم بیشتر علاقوں میں ٹھنڈی ہواؤں کا سلسلہ جاری ہے۔

محکمہ موسمیات کا کہنا ہے کہ شہر میں کل بارش کے باعث درجہ حرارت کم ہوسکتا ہے۔اس سے قبل ماہ فروری کے آغاز میں شہر میں تیزہواؤں کے سبب حادثات میں متعدد افرادجاں بحق ہوئے تھے۔