گوگل نیوز پر ہمیں فالو کریںپاک بحریہ نے بحیرہ عرب میں بروقت کارروائی کرتے ہوئے سمندری راستے سے سمگل کی جانے والی منشیات کی ایک بہت بڑی کھیپ پکڑی ہے جس کی عالمی مارکیٹ میں مالیت 750 ملین ڈالر بنتی ہے۔
پاک فوج کے شعبہ تعلقات عامہ (آئی ایس پی آر) کے جاری کردہ بیان کے مطابق، میری ٹائم سکیورٹی آپریشن کے دوران نیوی کے جنگی جہازوں پی این ایس حنین اور پی این ایس یرموک نے ایک مشکوک ماہی گیر کشتی کو طاق میں لیا۔
ترجمان کے مطابق، اس کامیاب آپریشن کے دوران کشتی سے 2,800 کلوگرام سے زائد وزنی منشیات برآمد کی گئی جسے انتہائی مہارت سے چھپا کر لے جایا جا رہا تھا۔ پکڑی جانے والی اس ممنوعہ کھیپ کی بین الاقوامی منڈی میں تخمینہ شدہ قیمت تقریباً 750 ملین امریکی ڈالر ہے۔
بحری سرحدوں کے محافظوں کی اس شاندار کامیابی پر پاک بحریہ کے سربراہ ایڈمرل نوید اشرف نے دونوں بحری جہازوں کے افسران اور عملے کی پیشہ ورانہ صلاحیتوں کو بھرپور سراہا اور ان کی کارکردگی کی تعریف کی۔
آئی ایس پی آر نے اپنے بیان کے آخر میں عزم ظاہر کیا ہے کہ پاک بحریہ ملکی سمندری حدود میں کسی بھی قسم کی غیر قانونی سرگرمی کو کچلنے کے لیے ہمہ وقت الرٹ ہے اور ملکی بحری مفادات کا دفاع ہر قیمت پر یقینی بنایا جائے گا۔
