گوگل نیوز پر ہمیں فالو کریںگھر کا بنا اچار اپنے منفرد ذائقے میں بے مثال سمجھا جاتا ہے، لیکن بعض اوقات اچار جلدی خراب بھی ہو سکتا ہے اگر تیاری اور حفاظت میں کوئی چھوٹی سی بھی غلطی رہ جائے۔ عموماً یہ اس وقت خراب ہوتا ہے جب اس میں نمی، گندگی یا ہوا داخل ہو جائے، یا نمک اور تیل کا توازن درست نہ رہے۔ نتیجتاً سبزیاں نرم پڑ جاتی ہیں، بدبو آنے لگتی ہے، پانی گدلا ہو جاتا ہے یا سطح پر پھپھوندی بن جاتی ہے۔
اصل مسئلہ اچار کی تیاری اور اسٹوریج میں ہونے والی معمولی لاپرواہیاں ہیں۔ اگر برتن اچھی طرح صاف اور مکمل خشک نہ ہو، سبزیاں دھونے کے بعد پوری طرح نہ سوکھیں، یا چمچ گیلا استعمال کیا جائے تو جراثیم تیزی سے بڑھتے ہیں۔ ایک دو قطرے پانی بھی خاص طور پر گرم اور مرطوب موسم میں پورے اچار کو خراب کر سکتے ہیں۔
اچار کو محفوظ رکھنے کیلئے ضروری ہے کہ اس میں نمک، سرکہ یا تیل کا ایسا توازن ہو جو جراثیم کی افزائش کو روکے۔ اگر یہ توازن بگڑ جائے تو فنگس اور بدبو پیدا ہونے لگتی ہے۔ نمک صرف ذائقے کیلئے نہیں بلکہ سبزیوں سے اضافی پانی نکال کر انہیں محفوظ رکھنے کے لیے بھی ضروری ہے، اس کی کمی سے سبزیاں گلنے لگتی ہیں اور اچار خراب ہو جاتا ہے۔
اچار ہمیشہ اس طرح رکھا جائے کہ تمام سبزیاں یا پھل مکمل طور پر تیل یا سرکے میں ڈوبے رہیں۔ جو حصہ اوپر رہتا ہے وہ سب سے پہلے خراب ہوتا ہے اور وہاں پھپھوندی بننے کا خطرہ بڑھ جاتا ہے۔ اچار کو کبھی دھوپ یا گرم جگہ پر نہ رکھیں کیونکہ اس سے اچار جلد خراب ہو جاتا ہے اور مصالحوں کی تاثیر بھی کم ہو جاتی ہے۔
لمبے عرصے تک اچار محفوظ رکھنے کیلئے چند احتیاطیں ضروری ہیں۔ ہمیشہ بالکل صاف اور خشک مرتبان، ڈھکن اور چمچ استعمال کریں اور استعمال کے بعد انہیں اچھی طرح خشک ہونے دیں تاکہ کوئی نمی باقی نہ رہے۔ سبزیوں کو دھونے کے بعد مکمل خشک کریں اور پھر اچار میں ڈالیں۔ ہر بار اچار نکالنے کیلئے صرف خشک چمچ استعمال کریں اور فوراً ڈھکن بند کریں۔ اچار کو ٹھنڈی اور اندھیری جگہ پر رکھنا بہتر ہے۔
اگر اچار میں عجیب بو، رنگ کی تبدیلی، لیس دار سبزیاں یا پھپھوندی نظر آئے تو اسے استعمال نہ کریں کیونکہ یہ صحت کیلئے نقصان دہ ہو سکتا ہے۔ اچار کو وقتاً فوقتاً چیک کرتے رہنا بھی ضروری ہے تاکہ بروقت خرابی روکی جا سکے۔ اگر یہ بنیادی احتیاطیں اختیار کی جائیں تو گھر کا بنا اچار کئی مہینوں بلکہ بعض اوقات ایک سال سے بھی زیادہ عرصے تک محفوظ اور مزیدار رہ سکتا ہے۔
