اسلام آباد: وفاقی وزیر برائے منصوبہ بندی و ترقیات اسد عمر نے گلگت بلتستان انتخابات میں متوقع شکست پر اپوزیشن کو بخار کی دوا لینے کا مشورہ دے دیا ہے۔
سماجی رابطے کی ویب سائٹ ٹوئٹر پر اپنے پیغام میں وزیرِ منصوبہ بندی و ترقیات اسد عمر نے کہا کہ اپوزیشن والوں سے درخواست ہے کہ گلگت بلتستان انتخابات پر سروے کو غور سے دیکھ لیں، بعد میں دھاندلی دھاندلی کا رونا شروع نہ کیا جائے۔
پیغام میں وفاقی وزیر اسد عمر نے کہا کہ اپوزیشن پہلے ہی شکست کیلئے ذہنی طور پر تیار ہوجائے اور طبیعت زیادہ خراب ہو تو بخار کی دوا بھی لے لے، آپ کی مہربانی ہوگی۔
اپوزیشن والوں سے درخواست ہے ان سروے کو غور سے دیکھ لیں…… بعد میں دھاندلی دھاندلی کا رونا نہ شروع کرنا…. پہلے ہی شکست کے لئے ذہنی طور پر تیار ہو جائیں اور طبیعت زیادہ خراب ہو تو ایک بخار کی دوائی بھی کھا لیں…. آپ کی مہربانی pic.twitter.com/fvv9nZyhey
— Asad Umar (@Asad_Umar) November 11, 2020
یاد رہے کہ اِس سے قبل سروے رپورٹس سے یہ انکشاف ہوا کہ گلگت بلتستان کے انتخابات میں عوام دیگر سیاسی جماعتوں کی بہ نسبت پی ٹی آئی کو ترجیح دے رہے ہیں۔
آن لائن سروے کے ادارے گیلپ سروے اور پلس کنسلٹنٹ کے ذریعے کیے گئے 2 سرویز سے گزشتہ روز یہ پتہ چلا کہ گلگت بلتستان میں آئندہ انتخابات کیلئے عوام کی اکثریت پاکستان تحریکِ انصاف کے ساتھ ہے۔
مزید پڑھیں: گلگت بلتستان میں پی ٹی آئی الیکشن جیت سکتی ہے، سروے رپورٹس