چاند نظر نہیں آیا، سعودی عرب میں پہلا روزہ 13اپریل کو ہوگا

ریاض: سعودی عرب میں رمضان المبارک کا چاند نظر نہیں آیا، پہلا روزہ 13اپریل بروز منگل کوہوگا۔

سعودی عرب کی ہلال کمیٹی نے اعلان میں کہا ہے کہ پوری مملکت میں کہیں بھی رمضان المبارک کا چاند نظر نہیں آیا اور کہیں سے بھی شہادتیں موصول نہیں ہوئیں۔

جامعہ المجمعۃ کے ماہرین فلکیات ہلال کمیٹی کے اجلاس کی سربراہی کر رہے تھے۔ ماہرین فلکیات نے کہا کہ غبار آلود موسم اور بادلوں کی وجہ سے چاند نظر نہیں آیا۔

دوسری جانب یاد رہے کہ سعودی ماہر فلکیات نے بھی پیشگوئی کی تھی کہ آج اتوار کے روز تمام عرب ممالک میں رمضان المبارک کا چاند نظر آنے کے امکانات کم ہیں، ممکن ہے کہ آج رمضان کا چاند نظر نہ آ سکے۔

بین الاقوامی خبر رساں ادارے کے مطابق سعودی عرب کی یونیورسٹی جامعہ المجمعہ سے وابستہ عبداللہ الخضیری نے کہا تھا کہ آج رمضان المبارک کا چاند دیکھنے کی امید کم ہے کیونکہ یہ غروب آفتاب سے تقریباً آدھا گھنٹہ پہلے ہی غروب ہو چکا ہوگا۔

اُن کا کہنا تھا کہ اگر ایسا نہ ہوا تو شعبان کے 30 دن پورے کیے جائیں گے۔سائنسی حساب سے مورخہ 12 اپریل 2021ء بروز پیر مکہ مکرمہ میں غروب آفتاب شام 6:38 پر ہو گا اور غروبِ ہلال 7:01 پر ہوگا۔اس لئے چاند نظر آنے کے امکانات بہت کم ہیں۔