عمران خان نے پاکستان کے آئین کو آگ لگائی ہے، بلاول بھٹو

کراچی: پاکستان پیپلزپارٹی کے چیئرمین بلاول بھٹو زرداری نے کہا ہے کہ پاکستان میں اس وقت ایک ایسے نظام کی ضرورت ہے کہ جہاں غیر جمہوری حکومت اقتدار میں نہ آسکے۔

چیئرمین پیپلزپارٹی بلاول بھٹو زرداری نے اپنے ایک پیغام میں عمران خان کی جانب سے اٹھائے جانے والے اقدامات پر بات کرتے ہوئے کہاکہ عمران خان نے پاکستان کے آئین کو آگ لگائی ہے لیکن ہم ان کی بغاوت کا سامنا کرنے کے لئے تیار ہیں۔

انہوں نے کہاکہ ہم عمران خان کی حکومت سے نجات حاصل کرنے میں کامیاب ہو گئے۔بلاول بھٹو نے کہا کہ پاکستان میں مضبوط نظام لانے کے لیے ہمیں اصلاحات کی ضرورت ہے اور ایسے نظام کی ضرورت ہے جہاں غیر جمہوری حکومت اقتدار میں نہ آسکے۔

انہوں نے کہاکہ ڈپٹی اسپیکر نے کہا اپوزیشن غیر ملکی ایجنڈے پر کام کر رہی ہے اور تحریک کو مسترد کر دیا جبکہ عمران خان نے جلد ہی قومی اسمبلی کو تحلیل کرنے کی تجویز دی۔

انہوں نے بتایا کہ ڈپٹی اسپیکر اور عمران خان کے دونوں اقدامات آئین کی خلاف ورزی تھے اور شکست کو تسلیم کرتے ہوئے عمران خان کا آخری مایوس کن عمل ایک اور بغاوت تھی۔

انہوں نے کہا کہ ووٹ کا سامنا کرنے کے بجائے ڈپٹی اسپیکر نے پوری اپوزیشن پر الزام لگایا لیکن ثبوت ہے کہ اتوار کو 342 میں سے 197 ارکان اپوزیشن بینچز پر آئے اور اب سپریم کورٹ کے پاس موقع ہے۔

مزید پڑھیں: عمران خان نے امریکی بھکاریوں کے ارمانوں پر پانی پھیرا ہے،خرم شیر زمان

تاریخ کو اپنے آپ کو دہرانے نہ دیں کیونکہ عدم اعتماد کی تحریک آئینی طریقہ ہے۔بلاول بھٹو نے واضح کیا ہے کہ عام انتخابات سے قبل انتخابی اصلاحات کر یں گے کیونکہ ان ایسا نظام لانا ہے جو آزادانہ اور منصفانہ انتخابات کی اجازت دیتا ہو۔