شہزاد اکبر کے مستعفی ہونے کے پس پردہ محرکات سامنے آگئے

اسلام آباد: وزیر اعظم کے مشیرِ داخلہ و احتساب کے مستعفی ہونے کے پس پردہ محرکات سے پردہ اٹھ گیا، میڈیا ذرائع کا کہنا ہے کہ شہزاد اکبر نے استعفیٰ دیا نہیں، بلکہ ان سے استعفیٰ طلب کیا گیا تھا۔

تفصیلات کے مطابق وزیر اعظم  عمران خان نے مشیرِ داخلہ و احتساب شہزاد اکبر کا استعفیٰ منظور کرلیا۔ باوثوق ذرائع کا کہنا ہے کہ وزیر اعظم آفس نے شہزاد اکبر سے استعفیٰ طلب کیا جس کی وجہ وزیر اعظم کی جانب سے ناراضی کا اظہار تھا۔

یہ بھی پڑھیں:

شہزاد اکبر نے مشیر احتساب کے عہدے سے استعفیٰ دے دیا

چند روز قبل وزیر اعظم نے شہزاد اکبر سے عدالتوں میں بدعنوانی اور کرپشن کے خلاف مقدمات کی تفصیلات طلب کیں۔ ذرائع کے مطابق شہزاد اکبر کی وزیر اعظم کو دی گئی تفصیلات نامکمل تھیں۔ فراہم کی گئی دستاویزات اور بریفنگ میں واضح فرق تھا۔

میڈیا (ہم نیوز) کے مطابق مقدمات کی ٹائم لائنز، کرپشن کیسز صورتحال اور وزیر اعظم کو دی گئی معلومات میں بھی تضادات سامنے آئے۔ یہی وجہ تھی کہ وزیر اعظم نے ناراضی کا اظہار کیا۔ شہزاد اکبر نے استعفیٰ طلب کیے جانے پر مستعفی ہونے کا فیصلہ کیا۔ 

خیال رہے کہ اس سے قبل وزیراعظم کے مشیر برائے داخلہ و احتساب شہزاد اکبر مستعفی ہوگئے،استعفیٰ وزیراعظم عمران خان کو بھجوا دیا ،شہزاد اکبر کا گزشتہ روز کہنا تھا کہ وہ عہدہ چھوڑ رہے ہیں، تاہم تحریکِ انصاف سے وابستہ رہیں گے۔