گوگل نیوز پر ہمیں فالو کریںاسلام آباد: وزیر اعظم کی معاونِ خصوصی برائے اطلاعات فردوس عاشق اعوان نے کہا ہے کہ وزیر اعظم پاکستان عمران خان بین الاقوامی برادری کے سامنے مؤثر اور باوقار انداز میں کشمیر کا مقدمہ پیش کریں گے۔
سماجی رابطےکی ویب سائٹ ٹوئٹر پر اپنے پیغام میں فردوس عاشق اعوان نے کہا کہ جنت جیسی وادی کشمیر میں 80 لاکھ مظلوم کشمیریوں پر عرصہ حیات تنگ کردیا گیا ہے۔ کشمیر کی گلیاں ویران جبکہ کوچہ و بازار سنسان پڑے ہیں۔ وزیر اعظم نے دورۂ امریکا کے دوران مختلف ممالک کے سربراہان سے ملاقاتوں کے دوران سب سے زیادہ کشمیر کے مسئلے کو اہمیت دی۔
80 لاکھ کشمیری مقبوضہ وادی میں محصور ہیں۔عمران خان نے دنیا کو باور کرایا کہ مقبوضہ جموں کشمیر میں انسانی بحران جنم لے سکتا ہے جس سے امن عالم کو شدید خطرات لاحق ہیں۔
— Firdous Ashiq Awan (@Dr_FirdousPTI) September 24, 2019
فردوس عاشق اعوان نے کہا کہ وزیرا عظم عمران خان نے دُنیا کو یقین دلایا ہے کہ کشمیر میں انسانی بحران جنم لے سکتا ہے جس سے پوری دنیا کے امن کو شدید خطرات لاحق ہیں جبکہ امریکی صدر سے ملاقات کے دوران بھی وزیر اعظم نے کشمیر سے کرفیو ختم کرانے پر زور دیا۔
یہ بھی پڑھیں: پاکستان جیسے ایٹمی ملک کے سب سے بڑے شہر میں کچرا اٹھانے والا کوئی نہیں۔مصطفیٰ کمال
معاونِ خصوصی اطلاعات فردوس عاشق اعوان نے مزید کہا کہ امریکی صدر ٹرمپ کا بیان وزیر اعظم عمران خان پر اعتماد کا اہار ہے جبکہ ایران سے بات چیت کا مینڈیٹ وزیر اعظم عمران خان کو دینا ان کی قائدانہ صلاحیتوں اور پوری دنیا کے پاکستان پر بڑھتے ہوئے اعتماد کا اعتراف ہے۔
ان کا کہنا تھا کہ وزیر اعظم عمران خان نے دیگر ممالک کے سربراہان، برطانیہ کے وزیر اعظم بورس جانسن، ترکی کے صدر طیب ایردوآن، ایران کے صدر حسن روحانی اور سوئٹزرلینڈ کے صدر اولی میور سے ملاقات کے دوران دو طرفہ تعلقات ، باہمی تعاون اور کشمیر میں انسانی حقوق کی خلاف ورزیوں سے آگاہ کیا۔ عمران خان نے پوری دُنیا پر واضح کیا ہے کہ علاقائی امن و سلامتی کے لیے مسئلہ کشمیر کا حل ناگزیر ہے اور خطے میں امن کے قیام کے لیے بھارتی حکومت کو لگام دینا ضروری ہے۔
وزیراعظم نے دیگر ممالک کے سربراہان، برطانیہ کے وزیراعظم بورس جانسن، ترکی کے صدر طیب اردگان، ایران کے صدر حسن روحانی اور سوئٹزرلینڈ کے صدر اولی میور سے ملاقاتوں میں دوطرفہ تعلقات کی مضبوطی، باہمی تعاون کے فروغ کی اہمیت پر زور دیا
— Firdous Ashiq Awan (@Dr_FirdousPTI) September 24, 2019
یاد رہے کہ وزیر اعظم پاکستان عمران خان آج اقوامِ متحدہ کے جنرل اسمبلی اجلاس میں مسئلۂ کشمیر سے عالمی برادری اور سربراہانِ مملکت کو آگاہ کریں گے جبکہ وزیر اعظم کی آج کی مصروفیات کا شیڈول بھی جاری کردیا گیا ہے۔
شیڈول کے مطابق وزیر اعظم عمران خان اقوامِ متحدہ کے 74ویں جنرل اسمبلی اجلاس میں شریک ہوں گے اور مقبوضہ جموں و کشمیر میں نافذ مسلسل کرفیو اور مظلوم کشمیریوں کے حالاتِ زندگی پر روشنی ڈالتے ہوئے بھارت کے ظلم و جبر کو پوری دنیا کے سامنے بے نقاب کریں گے۔
مزید پڑھیں: وزیر اعظم عمران خان آج اقوام متحدہ جنرل اسمبلی اجلاس میں مسئلہ کشمیر سے اقوام عالم کو آگاہ کریں گے
