گوگل نیوز پر ہمیں فالو کریںپاکستان نے بھارتی رجسٹرڈ طیاروں کے لیے اپنی فضائی حدود کے استعمال پر عائد پابندی میں مزید ایک ماہ کی توسیع کردی ہے۔ نئی پابندی کے تحت بھارتی طیارے 24 اکتوبر 2026 تک پاکستانی فضائی حدود استعمال نہیں کرسکیں گے۔
حکام کی جانب سے جاری نوٹیفکیشن کے مطابق پابندی کا اطلاق صرف بھارتی رجسٹرڈ طیاروں تک محدود نہیں بلکہ بھارتی ایئرلائنز اور آپریٹرز کے زیرِ ملکیت، زیرِ انتظام یا لیز پر لیے گئے طیاروں پر بھی ہوگا۔ پابندی کے دائرے میں فوجی پروازیں بھی شامل ہیں۔
پاکستان نے یہ فضائی پابندیاں 2025 میں پہلگام حملے کے بعد بھارت کے ساتھ پیدا ہونے والی کشیدگی کے تناظر میں عائد کی تھیں۔
فضائی حدود کی بندش کے باعث بھارتی ایئرلائنز کو پاکستان کے فضائی راستوں سے گریز کرتے ہوئے متبادل روٹس اختیار کرنا پڑ رہے ہیں، جس سے متعدد بین الاقوامی پروازوں کے دورانیے میں اضافہ اور ایندھن کے اخراجات میں بھی اضافہ ہوا ہے۔ بالخصوص یورپ، مشرق وسطیٰ اور وسطی ایشیا جانے والی پروازیں اس پابندی سے متاثر ہوئی ہیں۔
پاکستان کی جانب سے پابندی میں اس سے قبل بھی متعدد مرتبہ توسیع کی جا چکی ہے۔ تازہ فیصلے کے بعد بھارتی طیاروں پر پاکستانی فضائی حدود کے استعمال کی موجودہ پابندی مزید ایک ماہ تک برقرار رہے گی۔
گزشتہ ماہ پاکستان نے بھارتی رجسٹرڈ طیاروں کے لیے فضائی حدود کی بندش میں 24 ستمبر 2026 تک توسیع کی تھی۔
