پاک بحریہ میں جدید بحری جہاز ‘پی این ایس تبوک’ شامل کرلیا گیا

کراچی: بحری فوج کی طاقت میں مزید اضافہ، جدید بحری جہاز ‘پی این ایس تبوک’ کو پاک بحریہ کے بیڑے میں شامل کر لیا گیا۔

پاک بحریہ کے لیے تعمیر کردہ جدید کارویٹ ‘پی این ایس تبوک’ کی بحری بیڑے میں شمولیت کی تقریب پاکستان نیوی ڈاکیارڈ کراچی میں منعقد کی گئی، پاک بحریہ کے ترجمان کا اس حوالے سے کہنا تھا کہ چیف آف دی نیول اسٹاف ایڈمرل محمد امجد خان نیازی تقریب کے مہمانِ خصوصی تھے۔

چیف آف دی نیول اسٹاف ایڈمرل محمد امجد خان نیازی نے پی این ایس تبوک کی بحری بیڑے میں شمولیت کو پاک بحریہ کی آپریشنل صلاحیت کے لیے اہم سنگ میل قرار دیا۔

اُن کا کہنا تھا کہ بحری بیڑے میں جدید کارویٹ کی شمولیت سے خطے میں محفوظ میری ٹائم ماحول کے فروغ میں مدد حاصل ہوگی۔نیول چیف نے خطے کی تیزی سے بدلتی جیواسٹریٹجک صورتحال اور بڑھتے ہوئے میری ٹائم چیلنجز کے تناظر میں ایک مضبوط بحری فوج کی ضرورت اور اہمیت کو اجاگر کیا۔

انہوں نے مقبوضہ کشمیر کے عوام کے ساتھ ہونے والے ظلم و بربریت پر بات کرتے ہوئے اپنے حق خود ارادیت کے لیے بھارتی مظالم کے خلاف کشمیری عوام کی مثالی جدوجہد کو خراج تحسین پیش کیا۔پاک بحریہ نے دو یرموک کلاس کارویٹس کے حصول کے لیے 2017 میں معاہدہ کیا تھا۔

اس سلسلے کا پہلا جہاز ‘پی این ایس یرموک’ رواں برس جولائی میں پاک بحریہ کے بیڑے میں شامل کیا گیا، جبکہ دوسرا جہاز پی این ایس تبوک آج پاک بحریہ میں باقاعدہ شامل کیا گیا۔جس سے یقینی طور پر پاک بحریہ کی قوت میں مزید اضافہ ہوگا۔