گوگل نیوز پر ہمیں فالو کریںقومی ہاکی ٹیم نے ایشین گیمز میں اپنی عمدہ فارم کا سلسلہ جاری رکھتے ہوئے چین کو ایک اہم اور سنسنی خیز مقابلے میں 3 کے مقابلے میں صفر گول سے ہرا دیا۔ یہ ایونٹ میں پاکستان کی مسلسل تیسری کامیابی ہے۔
میچ کا تمام تر جوش و خروش دوسرے کوارٹر میں دیکھنے میں آیا جہاں گرین شرٹس نے جارحانہ کھیل پیش کرتے ہوئے حریف ٹیم پر دباؤ بڑھایا اور تینوں گول اسی وقفے میں اسکور کیے۔ پاکستان کی جانب سے کپتان ابوبکر سفیان خان اور ہونہار کھلاڑی حنان شاہد نے شاندار کھیل کا مظاہرہ کرتے ہوئے گیند کو جال کی راہ دکھائی۔
پوائنٹس ٹیبل کی صورتحال
اس بڑی فتح کے بعد قومی ٹیم کے پوائنٹس کی تعداد 9 ہو گئی ہے اور وہ گروپ میں دوسرے نمبر پر براجمان ہے۔ دوسری جانب بہتر گول اوسط کی وجہ سے ملائیشیا بھی 9 پوائنٹس کے ساتھ پہلے نمبر پر موجود ہے۔ یاد رہے کہ اپنے ابتدائی میچوں میں پاکستان نے تھائی لینڈ کو 0-9 کے بڑے مارجن سے آؤٹ کلاس کیا تھا جبکہ ازبکستان کو 1-5 سے شکست دی تھی۔
اہم کھلاڑی کی معطلی کا چیلنج
واضح رہے کہ چین کے خلاف اس اہم میچ سے قبل ٹورنامنٹ کے منتظمین اور ایشین ہاکی فیڈریشن کی جانب سے قومی ٹیم کے فارورڈ رانا وحید اشرف پر ایک میچ کی پابندی عائد کی گئی تھی۔ ذرائع کے مطابق یہ کارروائی ازبکستان کے خلاف میچ کے دوران اسٹک لگنے کے ایک واقعے پر کی گئی تھی۔
ایک اہم اور فرسٹ لائن فارورڈ کی غیر موجودگی کے باوجود، قومی کھلاڑیوں نے شاندار ٹیم ورک کا مظاہرہ کیا اور چین کو قابو میں رکھتے ہوئے میدان میں فتح کا پرچم لہرایا۔
