گوگل نیوز پر ہمیں فالو کریںسونے کی قیمتوں میں پیر کے روز کمی ریکارڈ کی گئی جس کی وجہ گزشتہ سیشن میں قیمت سات ہفتوں کی بلند ترین سطح پر پہنچنے کے بعد سرمایہ کاروں کی جانب سے منافع کمانے کے لیے فروخت کرنا ہے۔
عالمی مارکیٹ میں سونا سستا ہونے کے باعث امکان ہے کہ اس کے اثرات پاکستان کی مقامی مارکیٹ پر بھی پڑیں گے اور ملک میں سونے کے نرخوں میں کمی ریکارڈ کی جاسکتی ہے۔
گرین وچ مین ٹائم کے مطابق رات 2 بجے تک اسپاٹ گولڈ کی قیمت 0.5 فیصد کم ہوکر 4,322.28 ڈالر فی اونس رہی۔ جمعہ کو کمزور امریکی روزگار کے اعدادوشمار سامنے آنے کے بعد سونے کی قیمت 17 جون کے بعد بلند ترین سطح تک پہنچ گئی تھی۔
امریکی گولڈ فیوچرز میں بھی پیر کو کمی دیکھی گئی اور قیمت 0.4 فیصد گھٹ کر 4,381.60 ڈالر فی اونس ہوگئی۔
کے سی ایم ٹریڈ کے چیف مارکیٹ اینالسٹ ٹم واٹرر نے کہا کہ گزشتہ ہفتے امریکی نان فارم پے رولز (NFP) کے کمزور اعدادوشمار کے بعد سونے کی قیمت میں نمایاں اضافے کے نتیجے میں اب کچھ منافع وصولی ہورہی ہے۔
ان کے مطابق یہ صورتحال مارکیٹ کے رجحان میں بڑی تبدیلی کے بجائے قدرتی استحکام دکھائی دیتی ہے اور قلیل مدت میں سونے کی قیمت 4,300 ڈالر کی سطح سے اوپر رہنے کی توقع ہے۔
اعدادوشمار کے مطابق امریکی معیشت میں جولائی کے دوران غیر متوقع طور پر ملازمتوں میں کمی ہوئی جبکہ اس سے قبل جاری کیے گئے گزشتہ دو ماہ کے روزگار میں اضافے کے اعدادوشمار میں بھی نمایاں کمی کی گئی۔
اس کے بعد فیوچرز مارکیٹ میں 15 اور 16 ستمبر کو ہونے والے فیڈرل اوپن مارکیٹ کمیٹی کے اجلاس میں شرح سود میں اضافے کے امکانات بھی تبدیل ہوگئے۔ پہلے جہاں اضافہ ہونے کا امکان زیادہ سمجھا جا رہا تھا وہیں اب یہ امکان 50 فیصد سے بھی کم رہ گیا ہے۔
