چیئرمین پیپلز پارٹی بلاول بھٹو زرداری نے سابق صدر جنرل پرویز مشرف کے خلاف خصوصی عدالت کا فیصلہ آنے کے بعد جمہوریت بہترین انتقام کا پیغام دیا، جسے سزائے موت فیصلے کا ردِ عمل قرار دیا جاسکتا ہے۔
سماجی رابطے کی ویب سائٹ ٹوئٹر پر اپنے پیغام میں بلاول بھٹو زرداری نے جمہوریت کو بہترین انتقام قرار دیتے ہوئے جیئے بھٹو کا نعرہ تحریر کیا۔
Democracy is the best revenge. Jiye Bhutto pic.twitter.com/L4wLEjUJTl
— BilawalBhuttoZardari (@BBhuttoZardari) December 17, 2019
بلاول بھٹو زرداری کے ٹویٹ کو سابق صدر جنرل پرویز مشرف کی سزائے موت کے ساتھ جوڑتے ہوئے سوشل میڈیا صارفین نے اس پر انہیں مختلف قسم کے ردِ عمل سے بھی نوازا۔
یاد رہے کہ اس سے قبل آئین شکنی کیس میں عدالت نے سابق صدر جنرل (ر) پرویز مشرف کے خلاف فردِ جرم میں ترمیم کی درخواست مسترد کرتے ہوئے سزائے موت سنا دی ہے۔
سنگین آئین شکنی کیس کی سماعت کے لیے قائم کی گئی خصوصی عدالت میں جسٹس وقار احمد سیٹھ کی سربراہی میں ججز کے 3 رکنی بینچ نے سابق صدر جنرل (ر) پرویز مشرف کے خلاف فیصلہ سنایا۔
حکومت کی طرف سے پراسیکیوٹر علی ضیاء نے مشرف کے خلاف فردِ جرم میں ترمیم کی درخواست دائر کی۔ پراسیکیوٹر نے کہا کہ پرویز مشرف کے ساتھ ساتھ تمام ملزمان کا ٹرائل ایک ساتھ کرنے کے لیے سہولت کاروں اور ساتھیوں کو بھی ملزم بنایا جائے۔
مزید پڑھیں: عدالت نے سابق صدر پرویز مشرف کو سزائے موت سنا دی