کراچی، تین تلوار پر کار سوار کو لوٹنے والے دو ملزمان گرفتار

کراچی کے علاقے کلفٹن میں تین تلوار پر کار سوار کو لوٹنے والے دو ملزمان کو گرفتار کرلیا گیا ہے۔ 

لوٹ مار کی واردات کی سی سی فوٹیج بھی سوشل میڈیا پر وائرل ہوگئی تھی۔

ترجمان ضلع ساؤتھ پولیس کا کہنا ہے کہ پولیس نے دونوں ملزمان کو ٹارگیٹڈ کارروائی میں گرفتار کیا، ملزمان کو سی سی ٹی وی فوٹیج کی مدد سے شناخت کرلیا گیا۔

پولیس کے مطابق گرفتار ہونے والے ملزمان سے 4 موبائل فون، دو پستول بمعہ ایمونیشن برآمد کیے گئے ہیں، جبکہ پولیس نے واردات میں استعمال ہونے والے موٹرسائیکل بھی تحویل میں لے لی ہے۔

پولیس حکام نے بتایا کہ ملزمان نے دوران تفیش 15 وارداتوں کا اعتراف بھی کیا ہے، جبکہ ملزمان کا مزید کرمنل ریکارڈ چیک کیا جا رہا ہے۔

پولیس نے ملزمان کیخلاف مقدمہ درج کر لیا گیا۔ پولیس کے مطانق ملزمان میں حماد شاہ اور حسنین شامل ہیں، ملزمان سے برآمد پستول فارنزک کے لیے بھیجا جائے گا۔

پولیس کا کہنا ہے کہ گرفتار ملزمان کو مزید پوچھ گچھ کے لیے تفتیشی حکام کے حوالے کردیا گیا ہے۔