ڈاکٹر عبدالقدیر خان کی نماز جنازہ فیصل مسجد میں ادا کردی گئی

اسلام آباد: پاکستان کے معروف ایٹمی سائنسدان ڈاکٹر عبدالقدیر خان کی نماز جنازہ اسلام آباد کی فیصل مسجد میں ادا کی گئی۔

قائمقام صدر مملکت چیئرمین سینیٹ صادق سنجرانی ، کابینہ کے ارکان ، اراکین اسمبلی، سول اور عسکری حکام اور عوام کی بڑی تعداد نے کھلے میدان میں ہونیوالی نماز جنازہ میں بارش کے باوجود شرکت کی۔

اس سے قبل وفاقی وزیر داخلہ شیخ رشید احمد نے کہا تھا کہ ڈاکٹر عبدالقدیر خان کی تدفین سرکاری اعزاز کے ساتھ کی جائے گی۔

ڈاکٹر عبدالقدیر خان کی تدفین کے حوالے سے منعقدہ اجلاس کے بعد میڈیا سے گفتگو کرتے ہوئے شیخ رشید احمد نے کہا کہ وزیراعظم عمران خان کی ہدایات کے مطابق کابینہ کے تمام ارکان نماز جنازہ میں شرکت کریں گے۔

مزید پڑھیں:

ڈاکٹر عبدالقدیر خان کے انتقال پروزیراعظم اور صدر علوی سمیت سیاسی رہنماؤں کا اظہار تعزیت

ڈاکٹر عبدالقدیر خان کی تدفین سرکاری اعزاز کے ساتھ کی جائے گی، شیخ رشید

وفاقی وزیر داخلہ کا کہنا تھا کہ چیئرمین جوائنٹ چیفس آف اسٹاف کمیٹی نماز جنازہ میں شرکت کریں گے اور مسلح افواج کے اعلیٰ افسران بھی شرکت کریں گے جبکہ عوام کو بھی نماز جنازہ میں شریک ہونے کی اجازت ہو گی۔

واضح رہے کہ محسن پاکستان ڈاکٹر عبدالقدیر خان رضائے الٰہی سے انتقال کر گئے تھے ، ان کی طبیعت کافی عرصے سے ناساز تھی۔انہیں آج صبح طبیعت زیادہ بگڑ جانے پر کے آر ایل اسپتال منتقل کیا گیا تھا جہاں وہ انتقال کرگئے۔