گوگل نیوز پر ہمیں فالو کریںجی جی بالکل درست سمجھے آپ، آج سپر 12 کے گروپ ون میں انگلینڈ نے سری لنکا کو شکست دے کر آسٹریلیا کو ٹورنامنٹ سے باہر کر دیا۔
سری لنکا نے نسانکا کے 67 رنز سے تقویت پا کر سکور بورڈ پر 141 کا مجموعہ سجایا، مینڈس کے 18 اور راجاپکسا کے 22 کے سوا کوئی سری لنکن کھلاڑی دہرے عدد (ڈبل فگرز) میں بھی داخل نہیں ہو سکا، وہ ٹیم جو پاور پلے میں بہترین آغاز کر چکی تھی اور پاور پلے کے اختتام پر جس کا سکور 54 تھا اس کیلیے عادل رشید ایک ڈراونا خواب بن کر آئے۔
جنہوں نے باری کے درمیان میں کفایتی اور شاندار گیند بازی کرتے چار اوورز میں سولہ رنز دے کر ایک قیمتی وکٹ کھڑکائی اور وہیں سے سری لنکا میچ پر سے اپنی گرفت کھو بیٹھا، جو سکور 170 پلس ہوتا نظر آ رہا وہ 141 تک محدود رہا۔
اب تاجِ برطانیہ کے نام لیواؤں کی باری شروع ہوئی تو الیکس ہیلز نے گویا میدان میں بلے بازی سے آگ لگا دی، محض 30 گیندوں پر سات چوکوں کی مدد سے 47 رنز بنائے اور باری میں ایک گیند کو ہوائی راستے سے بھی باؤنڈری لائن میں پہنچایا، پاور پلے کا مطلب پاور ہٹنگ اور وہی کچھ کام انہوں نے کیا کہ پاور پلے کے اختتام پر انگلینڈ کا سکور 70 ہو چکا تھا، فتح کی بنیاد رکھی جا چکی تھی اور آسٹریلین کے چہرے بجھ چکے تھے۔
کہانی میں موڑ تب آیا جب الیکس ہیلز کے بعد تمام برطانوی کھلاڑی ”تو چل میں آیا” کی گردان کرتے ہوئے واپس چلنے لگے مگر وکٹ کی ایک طرف بین سٹوکس جم چکے تھے، لمبی ریس کا گھوڑا بین سٹوکس جس نے 42 رنز کی باری میں اگرچے چوکے تو بس دو ہی لگائے مگر نیت واضح کر دی کہ میں نے میچ ختم کرنا ہے اور میں نے ٹیم کو فنش لائن کے پار لے کر جانا ہے۔
اس دوران ہیری بروک، لیونگسٹن، کرن اور معین علی بھی ٹیم کو بیچ منجدھار چھوڑ کر چلتے بنے اور بالآخر کرس ووکس نے سٹوکس کے ساتھ مل کر سیمی فائنل کیلیے جگہ پکی کر لی، گروپ ون سے ہر قسم کے اگر مگر کا خاتمہ ہوا اور یوں اب یہ سنسنی خیز ٹورنامنٹ اپنے اختتام کی جانب بڑھ رہا ہے۔
آسٹریلیا کے آج ٹورنامنٹ سے باہر ہونے سے میزبان ملک کے آئی سی سی ٹی ٹونٹی عالمی کپ نہ جیتنے کی روایت برقرار رہی اور اب اس بار نیا آسٹریلیا کی بجائے ہم کسی اور کو چیمپین بنتا دیکھیں گے۔
عادل رشید کی سوئی ہوئی فارم عین موقع پر فارم میں پہنچی اور یقیناً اگلے میچز کیلیے یہ نہایت ہی کار آمد بات ہے، اس گراونڈ پر نیوزی لینڈ اپنا سیمی فائنل میچ کھیلے گی اور انگلینڈ نے ایڈیلیڈ اوول کا رخ کرنا ہے۔
مزید پڑھیں:ورلڈ کپ، سری لنکا کو شکست دیکر انگلینڈ سیمی فائنل میں پہنچ گیا
ہمارے لیے صورتحال تسلی بخش نہیں ہے، اگر کل کے پہلے میچ میں جنوبی افریقہ اپ سیٹ شکست کے باعث نیدر لینڈ سے ہار جاتا ہے یا ان کا میچ بارش کے باعث غیر نتیجہ قرار پاتا ہے تو پاکستان کا چانس بنتا ہے جب ہم بنگلہ دیش سے جیت جائیں گے
یا
بھارت کو زمبابوے سے شکست ہو جائے تبھی سیمی فائنل کی ٹکٹ مل سکتی ہے، اس کے علاوہ اور کوئی چانس نہیں۔
