گوگل نیوز پر ہمیں فالو کریںکراچی پولیس نے ایک ہفتے کے دوران مختلف کارروائیوں میں 944 سے زائد ملزمان کو گرفتار کیا۔ پولیس ترجمان کے مطابق شہر میں پولیس اور ملزمان کے درمیان 26 مقابلے ہوئے، جن میں 5 ڈاکو ہلاک جبکہ 30 ملزمان زخمی ہوئے۔ اس دوران 42 ملزمان کو موقع پر ہی گرفتار کیا گیا۔
پولیس کے مطابق منشیات کے خلاف کارروائیوں میں بھی متعدد ملزمان گرفتار ہوئے۔ گرفتار افراد کے قبضے سے مجموعی طور پر 7 کلو 286 گرام چرس، 2 کلو 665 گرام آئس، کرسٹل اور ہیروئین برآمد کی گئی، جبکہ منشیات فروشی میں ملوث عناصر کے خلاف قانونی کارروائی بھی کی گئی۔
مختلف آپریشنز کے دوران گرفتار ملزمان سے 178 غیر قانونی ہتھیار بھی برآمد کیے گئے۔ اس کے علاوہ پولیس نے 16 موٹرسائیکلیں اور 4 گاڑیاں بھی تحویل میں لیں، جبکہ برآمد ہونے والے اسلحے اور دیگر سامان کی جانچ پڑتال کا عمل جاری رکھا گیا۔
ترجمان پولیس کا کہنا ہے کہ گرفتار ملزمان کے خلاف متعلقہ تھانوں میں مقدمات درج کر لیے گئے ہیں۔ پولیس کا کہنا ہے کہ مختلف جرائم سے متعلق کیسز میں مزید تفتیش جاری ہے، جبکہ گرفتار افراد سے تحقیقات کے ذریعے دیگر ملزمان اور جرائم کے حوالے سے معلومات حاصل کی جا رہی ہیں۔
